Aakwiita ya Rwanda ya ya mu DRC

KINSHASA – Aakwiiya ya Rwanda ya konda po 1 500 oya taaguluka oongamba okuya muDRC-umbugantu mEtiyali, ya ka ndjoine mboka ya DRC okukondjitha Oorebele dhAahutu – ndhoka dha li dha kutha ombinga momadhipago ga nyanyaleka mu Rwanda gomomumvo 1994.

Omugandjimulombo gwEpangelo lya DRC, Lambert Mende okwa ti aakwiita ya Rwanda oya thiki ongula yEtiyali na iikonga yaakwiita ye li mumwe otaya ka kwata uule womasiku 15.
‘Otwa pula pambelewa aakwiita ya Rwanda ya kuthe ombinga miikonga yokuhomatokulula Aainterhamwe yAahutu, mbyoka ya tameka,’ Mende osho a popi ngaaka.
Iilongo mbika iyali yAafrika lyopokati oya li ya tsu kumwe omathimbo ga zi ko yi nane ko kepaya mokukondjitha Oorabele dhika, dhoka dhi li moshitopolwa sha DRC shi li oongamba na Rwanda.
Nande ongaaka, kapu na shimwe shomiilongo mbika sha pondola okuvudha mo Oorebele dhika, okuza mpoka sho sha thigi po Rwanda okuya ku DRC momumvo 1994.
Etumo lyIigwanahangano mu DRC olya popi kutya lyo miikonga mbika kaye mo , ihe olye shi koleke kutya aakwiita ya Rwanda oya ya mu mu DRC.
Omugandjimulombo gwaakwiita yIigwanahangano mu DRC, Kolonela Jean-Paul Dietrich okwa ti aakwiita ya Rwanda ye li 1 500 sigo 2 000 oya yi mu DRC. Louise Mushikiwabo, Ominista yOmauyelele ya Rwanda, okwa ti aakwiita ayehe oye li kohi ya Komanda yEtanga lyEgameno lya DRC.
Omuwiliki gwongundu yOorebele dhAatutsi, Laurent Nkunda, okwa li a longitha omapiyaganeko ngoka taga etwa kOorebele dhAahutu ong’oshinima shoka osho she ya kuthitha omatati opo yi igameme (kOorebele dhAahutu) moshitopolwa shika oshiyamba moonzo dhopauntshitwe.
Ihe aantu yamwe otaya popi kutya Nkunda okwa hala unene okupangele neliko lyoshilongo. – Nampa-AP