Aakwiita aakulu yetanga lyoSWATF ya nyokomwa

AAKWIITA aakulu metanga lyoshitopolwa nenge ndyoka ha li ithanwa South West Africa Territory Force yeli lwopo 5 000 oya kanitha kehe gumwe oodola 182 uule womasiku ga piti.

Iimaliwa mbika oye yi kanitha sho ya futu opo aniwa ya shangwe ya ka futwe omwaalu gu li poodola 490 000 noshowo aniwa ya kale haya mono opensela uule wonkalamwenyo ayihe.Omukalelipo gwe tanga ha li ithanwa SA Coloured Corps ndyoka konima lya tseyika SA Cape Corps, okwa ti aniwa aakwiita aakulu mbaka ota ya ka pewa iimaliwa yawo pokati ko 30ga Septemba na ga 7 ga Kotoba nuumvo moshilando sha Upington, South Africa.’Mboka owo ashike uulingilingi okukonga oshimaliwa. Tse katu shi oshinima, nenge omahokololo ngoka ta ga popi oku futwa kwatya ngaaka., naashika osho omitoto ngaashi sha li omitoto oomvula ntano dha zi ko,’omunambelewa gumwe omukuluntu mombelewa yomukalelipo gwa South Africa moNamibia ta ti.Aatolinkundana ya The Namibian oya talelepo egumbo mo Khomasdal metiyali mpoka pwa li tapu shangithwa aakwiita mbaka ku Neville Waggie.Waggie okwa lombwele mboka ya li ta ya ishangitha kutya kehe gumwe otaka pewa oodola 34 000, ndele uukumwe wa SA Cape Corps owa tula mo eindilo opo omuntu kehe a futwe oodola omayovi 490 000 omolwa iihohela mbyoka ya futwa uule konyala woomvula 15 dha piti.Pahokololo lye, ehangano lye oli, ili okuyeleka naangoka ga li taga shangitha aantu nale,ngaashi ndyoka lyo South African National military Veterans Forum, ndyoka lya li lya futitha kehe gumwe gwaakwiita mbaka 5 000 oodola 55, naambaka oya li ta ya shangelwa poRehoboth.Waggie ka li ta vulu okuulika omishangwa dha sha kombinga yehangano lyepangelo, nokwa ti ondjai January mo South Africa oye e li omutse gwehangano lyawo nokwa sindana moshipotha nepangelo lya SA kombinga yokufuta akwiita yonale ya SWATF naamboka yoCape Cross.’Shoka ita shi zi kepangelo lyetu. Ka tu na epangelo kombanda yaashika kakele ngele pamwe gumwe okwa kwata mbaka.Onkalo ta yi nikitha oluhodhi kaantu yaNamibia’ omunadiploma gumwe gwa South Africa a ti.Opolisi ya Namibia oya pula uuyelele kombelewa ya komufala gwopombanda gwa South Africa moNamibia, ndele sigo oompaka inaya kwata po nando omuntu gumwe.Onzo yimwe oya ti aapolisi yamwe oya li moSWATF onkene ina ya hala okukwata Waggie na yalwe mboka ya li ya shanga aantu poRehoboth, Tsumeb, no Malinda.Oomvula ntano dha piti opolisi ya Namibia oya li ya kuthako omishangwa kwaamboka ya li ya shanga aantu moshilando ngaashi moKatima Mulilo.Elalakano lyawo olya li okumona omake ogendji opo ya thiminike epangelo lya Pretoria li fute aakwiita kwa li mbaka.Ehangano lyoonakulwa aakulu li na oombelewa moKimberly olya li lya shanga aantu 161 000 ndele sigo oompaka kapena shoka shaningwa po aniwa.Waggie okwa lombwele mboka a shangitha kutya na ya kale moUpington 30 ga Septemba opo ya ka manithe eishangitho lyawo.Oye na aniwa okufaalela omishangwa dhawo dhi na sha niilongaa yawo moSWATF,na oye na okukala mpoka opo ya vule okushaina oombapila dhawo.Kapena eshilipaleko kutya aakwiita yonale mbaka ota ya ka mona iimaliwa.Shoka ye na oku ulika kutya oyi ishangitha osho okaslipa kagandjwa ku Waggie , ka kena ondjukithi nenge ando omauyelele gamwe guukumwe mboka wa popiwa ku Waggie.Oofoloma ndhoka aakwiita yonale mbaka ya udhitha kadhina ndjukithi nenge sha shilwe tashi popi kombinga yuukumwe mboka.Yamwe yo maakwiita aakulu mbaka oya ti, oya sa ondjala yoshimaliwa na onkene oyi ilongekidha oku kanitha oodola 182 opo ya vule oku mona ompito yo kulikola oodola 490 000 ngele odhoshili.Yamwe oya tseyithile ooyakwawo mboka ye li komahala gokokule opo ye, ye koVenduka yi ishangithe omanga okwiishangitha inaa ku hula mokati kuusiku wetitatu.Sigo oompaka Waggie nongundu ye oya taamba oodola konyala 910 00 oku za maakwiita nale 5 000 mboka yi ishangitha.Omukalelipo gwaSouth Africa moNamibia okwa ti ke na sha noshinima shika nenge naashoka ta shi ningwa kaakwiita yonale mbaka, opo aniwa ya pewe iimaliwa mbyoka ta yi popiwa.Momumvo 2004 Oshikondo shoopenzela sha South Africa osha li sha nyolele aakwiita yamwepo yoSWATF kwali nokutya omishangwa dhawo odha hanagulwapo.Oya li ya tseyithilwa kutya oshikondo shoopenzela oha shi kala ashike nomauyele genasha nefuto lyopenzela uule woomvula heyali, konima sho openzela ndjoka ya futwa nokuza mpoka omishangwa ndhika ota dhi hanagulwapo.Onkene omishangwa adhihe dhi na sha noshinima shika odha hanagulwapo.Omanga Ehangano lyoopenzela lya South Africa olya nyola ta li ti, iimaliwa mbyoka li na oyi na sha ashike niiketha yoopenzela, ndele ka yi nasha noohandimwe.Iilyo yoSWATF nale moNamibia oya li ya futwa ashike oodola 1 300 kehe shimwe konima yemanguluko sho oomiliona 32 ndhoka dha gandjelwe kepangelo lya South Africa ya li ya topolelwa aakwiita mbaka noshowo aakondjelimanguluko.