Aakwashigwana ye li 26 ya sa omeya mo Nooli yopokati

NONANDO efundja inali ya natango unene, okuniwe uumbanda kutya aakalimo moNooli, otaya ka sa omeya oyendji ngele inapu ningwa omakunkililo giihwapo, unene tuu sho omvula ya tameke okuloka mu Desemba 2009 nomu Januari 2010 kwa lopotwa kwa sa nale omeya aakwashigwana ye li 26.

Pakonaakono ndyoka lya ningwa po kOshifo shika oyendji yomoonakusa omeya mbaka aanona okuza pomvula yimwe sigo 18 nenge aagundjuka okuza poomvula omulongonahetatu sigo omilongondatu nantano nenge naheyali lwaampoka. Komanda gwOpolisi mOshitopolwa sha Shana Komufala gwOpolisi Ndahangwapo Kashihakumwa mOshitopolwa she moka omo mu na Okila yOpolisi ndjoka hayi konaakona omidhimba dhaantu mboka ya sa omaso gaashi gopauntshitwe mwa kwatelwa ngoka gomaso gomomeya mOshitopolwa sha Shana, sha Musati, sha Hangwena, sha Shikoto ombinga yimwe nosha Kunene, okwa koleka ko The Namibian kutya osho naanaa kutya okuza sho omvula ya tameke okuloka mu Desemba omvula ya zi ko sigo omu Januari nuumvo, oya lopotelwa aakwashigwana ye li 26 ya sa omeya nomidhimba dhawo dha konaakonwa (dha tandwa) mOkila yawo mOshakati. Ta ti oyendji yomaakwashigwana mbaka aanona naagundjuka, ko taku landula nee aakuluntu naakulupe. Ta ti omuyalu nguka ogwaakwashigwana ya sa omeya oku za meti 7 Desemba 2009 sigo ometi 29 Januari 2010 ashike. Ta ti petameko lyOmwedhi nguka, unene meti 1 Febuluali 2010, okwa lopotelwa nale eso momeya lyomukwashigwana gumwe. Omvula ya zi ko, pethimbo lyomvula lya faathana naandika lya popiwa pombanda, okwa li kwa lopotwa aakwashigwana ye li 28 ya sa omeya nethimbo lyomvula alihe sho lya ka pwako okwa ka lopotwa aakwashigwana ye vulithe 150 ya faalelwa komeya. Omidhimba dhayamwe odha ka monika lela kwa toka omvula ya zi ko, sho oonakusa omeya mbaka ya li ya kungululwa po komeya nokufalwa komakulekule hoka. Pa lopota yOpolisi, oyendji yomoonakusa omeya nuumvo oyomOshitopolwa sha Musati, ye li yahetatu (8). Taku landula oHangwena ye li yaheyali (7) noShana ye li wo yaheyali (7), yomOshikoto ye li yaali (2) noyomOkunene ye li yaali (2). Aakwashigwana yomOmusati ya sa omeya, omwa kwatelwa okanona kokamati komvula yimwe Abel Iitembu gwomOkahao, koomvula mbali Petrus Gita gwomOkafitu, okanona koomvula ntano Easy Megameno Andjaba kOmoshipaya mOmbalantu noshowo omvula ntano Lahya Gabriel Amunyela komOkathitu noshowo omugundjuka gwoomvula 18 Jeremia Iita gwoko Ruacana. mOshitopolwa sha Shana omwa sa omeya okanona komvula yimwe (1) David Amutenya Mutoto, koomvula mbali (2) Natangwe Junias nokoomvula hetatu (8) Abner Nanyemba, mOhangwena omwa sa omeya okanona koomvula mbali Tuliyameni Haufiku, koomvula hetatu Komeya Shilunga, koomvula 12 Markus Taliya noshowo nee omukokele gwoomvula 66 Hilde Elia. Moshitopolwa sha Shikoto omwa someya okanona koomvula omugoyi (9) Josef Matheus, omanga ngoka gokOshitopowla sha Kunene oye Pahe Tjondu gwoomvula 27.Komanda gwOpolisi mOshana kOmufala gwOpolisi Kashihakumwa okwa indila kaavali, kaaakuluntu yaanona nokAawiliki ayehe kutya nee oyoPapolotika, yOpamuthigululwakalo, yOpangeleka nayalwe yopashigwana, ya kale nokutakamitha nokukumagidha aanona ya kale kokule nomeya,omanga kombinga yaagundjuka noyaakuluntu a ti kutya nayo ya kale ya lungamena omeya, unene tuu yi iyageke okutaaguluka iishana yomeya uusiku manga ya nwa mo okuza koondingosho hoka. Elenga enene lya Mbalantu mOshitopolwa sha Musati tatekulu Oswin Mukulu, okwa ti kutya ye nElelo lye otaya ka tameka niikonga yokuuvitha ko oshigwana oshiponga oshinene shesomeya mokati koshigwana shawo. Tati aakwati yoohi nayo wo oye li moshiponga shokusa omeya. Gavena yOshitopolwa sha Hangwena omasiku ga zi ko naye okwa yi mombepo ta kunkilile oshigwana she shomOhangwena shi kotokele omeya, unene tuu kukunkililwe aanona kaayadhanene we omeya nokuya kiishana nokomadhiya oyo ayeke.