Aakulupe ota ya ka futwa openzela yawo omwedhi nguka

OMUNAMBELEWA Omukuluntu mOkampani ndjoka hayi futu aakulupe, aanuulema noothigwa muumgangalantu yedhina Epupa Investment Technology (PTY) LTD Marius Nangolo okwa lombwele oshifo shika omasiku ga zile ko kutya aakulupe ayehe mboka ya li inaya mona Openzela yawo mu Novemba na Desemba omvula ya zi ko 2010 omolu Ehangano ndyoka lya kala hali futu aakulupe shito lya zi po ombaadhilila sho Okontraka yalyo nEpangelo ya pu ko, otaya ka futwa momwedhi nguka Februari 2011.

Aakulupe oyendji moKrismesa nomOmumvo omupe oya yile mo inaya kwata oshimaliwa shawo noya kala kaye uvite ombili nande moshinima shika. Omusamane Nangolo kuyele okwa yile wo moRadio NBC Oshiwambo ta tseyitha kutya aakulupe mboka otaya ka futwa oshimaliwa shawo shoka sha kala konima mOmwedhi nguka Februari. Okampani nenge Ehangano ndjoka lye ya po epe, ano lyedhina lya tumbulwa metetekelo, tate Nangolo ota ti kutya olya tokola okulonga nuudhiginini nokuyakula aakulupe nawa lela ngashi sha kala shito nenge nokuli shi vule po. Ombelewa yawo onene yAakulupe muumbangalantu otayi adhika pUupindi mOshakati mOshitopolwa sha Shana muumbangalantu womahooli gopUupindi mpoka. Tate Nangolo ta ti oyi li megameno enene lela lyOosekurity noya tulwa wo molugumbo lwa kola lu na ondhalate yolusheno ya tulwa ko kOkampani yokutula ko omalusheno komakuma gomagumbo nokomalugumbo goondhalate yomusamane David Shaanika, yedhina DVS Electronics.Tate Shaanika, ota ti kutya kehe ngoka wa hala okutulilwa ko olusheno kekuma lyohofa yoye nenge kondhalate yohofa yoye, ya mona ashike otaye ku longele po iilonga mbyoka meendelelo nonondjungu. Ohaya tula wo uungendjo womalondodho pomiyelo dhomatungo nomagumbo nosho tuu okutula omiyelo dhokwakola pomiyelo dhOohofa dhomagumbo, oongeshefa nosho tuu.