Aakiintu yoSwapo ituliimo mehwahwameko lyoshigwana

AMUSHANGA gwEwawa lyOomeme yOngundu yOswapo, Petrina Haingura okwa indila kOomeme yOswapo yi itule mo miilonga yehwahwameko lyoshigwana shi ka hogolole Oswapo momahogololo gOpaupresidende nogOshigongi shOpashigwana ngoka ge li ko okuza eti 27 sigo eti 28 Novemba 2009.

Minista yOpevi Haingura, mOlyomakaya ga zi ko, okwa li a egulula Oshigongiilonga shEwawa lyOomeme yOswapo moNooli, sha ningilwa mOshakati nosha li sha kalwa koomeme yOswapo.’Onda nyanyukwa unene sho mwa holoka mengathithi li thike mpaka kOshigongiilonga sheni shOswapo, na unene tuu shEwawa lyOomeme yomongundu yOswapo , mwe ya mwa hala okupulakena sho tandi mu lombwele ngaye onga Amushanga gweni nomwe ya wo okumona omauyelele, omaunongo noondunge nkene mu na oku ka hwahwameka oshigwana ngiini shi ka hogolole Oswapo momahogololo twa taaleleni. mOshigongiilonga shika, otamu ka longwa nokupewa omaunongo gi ili nogi ili moshinima shehwahwameko lyoshigwana shi ka hogolole nawa, shi ka hogolole Oswapo yetweni ya Namibia nomake ogendji noku ke yi pa iipundi ayihe yomOshigongi shOpashigwana omilongoheyali niiyali,’me Haingura ta ti ngawo nokugwedha po ta ti oomeme naya ka longe oshigwana shi ka tule okakombo mpoka pu na Oswapo mokambapila komahogololo, ano mpoka pu na Oswapo nomu mentu a yedha ongonyo pombanda.Me Haingura okwa lombwela oomeme yOswapo kutya Ongundu yOswapo oyo ashike yi na Omilandu nOoprograma dhi li nawa notadhi lundulula nokuukitha ko onkalo yoshilongo noshigwana ashihe pwaa na ondjoolola yasha ta ti omahogololo gIilyo yomOmutumba gwOpashigwana yOswapo ngoka ga ningilwe kOswapo omasiku ga zi ko, oga endele pamanguluko nopauyuki lela, shoka sha ulike kutya Oswapo otayi vulu okuninga iinima yayo yene yuukilila nawa noyi li palandulathano. Oshiwike osho tuu shoka, me Haingura ta ti, Omupresidende okwa tula wo miilonga Omanifesto yOngundu yOswapo, ndjoka pethimbo ndika tayi ende tayi fatululilwa oshigwana kwaamboka ye shi inekelelwa.Mombapila moka, Minista yOpevi Haingura, ta ti kutya omwa popiwa nee ayihe mbyoka tayi ka ningwa po kEpangelo li li mewiliko lyOswapo ngele Oswapo oya yi natango koshipundi momahogololo ngoka twa thinda. Haingura ta ti Oswapo nEpangelo lyayo oya eta po nale oshindji ngashi Uudemokoli, Uukumwe, Epangelo li ikankameka keenditho nokuninga ayihe yi ikwatelela kompango, lya eta po ombili nengungumano, emona lya manguluka neyokomeho lya kwatwa nawa, eyambulopo lyonkalonawa nuukolele woshigwana, etotopo lyomagumbo nomalukanda , etotopo lyomidhingoloko nekalekopo lyoonzo dhopauntshitwe, enkondopaleko lyoshigwana paendondo dhi ili nodhi ili, etulopo lyehumokomeho lyemona lyoshigwana nelongitho lyalyo. Niikwawo oyindji.Haingura ta lombwele oomeme yOswapo ya kwawo mbaka kutya ehwahwameko lyawo lyoshigwana ina li hulila ashike momahogololo ihe li tsikile nomiinima yi ili noyi ili wo yesiku kehe mokati koomeme noshowo mootate wo moka, oshoka oomeme oya tseyika ye na aluhe eitulomo enene meyakulo lyoshigwana shawo, okuza ngaa maanona yawo sigo omaasamane yawo nomu yo yene neee nduno. Ta ti oomeme naya dhiginine oshitya hashi popiwa kOmukokolipresidende kutya ‘Oshigwana shi li kumwe, tashi lalakanene oshinima shimwe, aluhe ohashi ka adha esindano’.