Aakiintu oyendji aaniiyemo yopevi taa itungile omagumbo gawo

AAKIINTU aaniiyemo yopevi aakalimo yomomalukanda gondoolopa yaNdangwa ngaashi mOkangwena oyo yeli komeho mokwiitungila omagumbo gawo yene okupitila moskema yomikuli yo Twahangana Poor People’s Fund yehangano lyaaniiyemo yopevi lya Shack Dwellers Federation of Namibia (SDFN) shi vulithe paalumentu.

Momagumbo 65 ga tungwa okuza nomikuli dhehangano ndika okuza momumvo 1999 sho ehangano lya holokelemo, aakiintu oya tungitha omagumbo 60 omanga aalumentu ya tungu owala gatano.
Eyooloko ndika olye etithwapo konkalo yokwaana iilonga moka aakiintu oyendji tayi iyadha shivulithe aalumentu mwa kwatelwa ondjungu aakiintu yena ninga iilyo yoongundu dhomapungulilo nomaindungiko moshitopolwa shika.
Moonkundathana twa ningi nameme Hileni Penny Shikongo Omuunganeki gwehangano ndika miitopolwa Oshana, Ohangwena nOshikoto kombinga okwa hokolola kutya ngashiingeyi oyena oongundu dhomapungulo goshimaliwa dhili 52 kohi yewiliko lyoshitopolwa shawo.
‘Okukala oshilyo shehangano ndika ka shinasha owala nomapungulo goshimaliwa awike, ashike ohatu ningi woo omaindungiko muukalinawa, melongo, mekalekopo lyuushitwe, noku kala nawa monkalamwenyo noshotuu.
Onkee nee onda hala oku hiya aakalimo yomomalukanda ayehe unene tuu ootate opo muye mu ninge iilyo’, osho Shikongo a yelitha.
Okwa hokolola nkene aalandithi yuungeshefa uushona ya vulu oku tungitha omagumbo gawo oku ziilila momapungulo gawo gamwe gongushu N$20 000 yamwe oyi vulithepo. Moku talelapo oshitopolwa shimwe moka mwa tungwa omagumbo giilyo yehangano ndika, eopalo nongushu yomagumbo ngaka otaga ulike nkene ehangano ndika tali eta omalunduluko moonkalamwenyo dhaantu yoshitopolwa shika.
Kepulo kutya omolwashike aalumentu kaayena ohokwe yoku ninga iilyo yehangano ndika, Shikongo okwa holola ngaa kutya nando etompelo lyo lela inali tseyika, uunye woku gongala miigongi yomaindungiko nomauyelele nenge okwaa uvako nawa omalalakano gehangano ogo gamwe gomomatompelo.
Ka kele komikuli dhokutunga omagumbo, ehangano ndika ohali gandja woo omikuli dhokutulitha mo omayakulo ngaasho omeya, uundjugo, nolusheno momagumbo, okutota oongeshefa noku dhi yambulapo, noshowo okulanda oodhalate dhomankolo komapya komikunda.
Oshilyo otashi vulu woo okukutha mo miimaliwa yasho yili momapungulilo goongundu okukandulapo omaupyakadhi gopaumwene mwa kwatelwa oofuto dhosikola nosho tuu.
‘Mpaka opena ompito yoku yambulapo onkalamwenyo yoye.
‘Oyendji oya lundulula oonkalamwenyo dhawo nok totapo uungeshefa wawo uushona paindilo lyomikuli dhetu. Muka oto vulu okupungula okamaliwa kehe unapo kutya N$2 mesiku nosho tuu.
‘Oyendji sho ya ningi iilyo yoongundu dhomapungulo ka yali yeshi oku kwata nenge ku pungula oshimaliwa, ihe ngashingeyi oya ninga omapungulo geli pombanda’, osho a tsu omukumo ngaaka.
Kakele komOndangwa, ehangano ndika olina woo iitayi moondoolopa odhindji moshilongo ashihe noha li longo woo pamwe nekwatathano ewanawa nomalelo goondoolopa gawo nokukonga omahala gokutungila omagumbo giilyo yalyo.
Shika otashi ulike kutya omutumba ihagu eta sha shili.