Aakiintu moKavango niiyimati ya Ndonga Linena

AAKIINTU yaana iilonga popepi noshikunino shokutekela shopoNdonga Linena moKavango oya mono ompito ombwaanawa sho ya tameke okushingitha iiyimati ,iihape noomboga ndhoka hadhi longwa poshikunino shoka.

Aakiintu mbaka oha ya landitha iilandithomwa yawo kaalongithi yondjila onene ya TransCaprivi. Aakiintu mbaka oyendji ya za momikunda ngaashi gwa Kagcuva na Rumwemwe oha ya landa iihape ngaashi enyangwa, oonyanga, omalemoana, noshowo iikapa , oku za poshikunino sha Ndonga Linena yo ta ya kuutumba kohi yomuti popepi nondjila ya Trans Caprivi, mpoka aalandi ha yeya nokulanda shoka ya pumbwa. Omukiintu gumwe ngoka a tameke tango okulanditha mpoka, Leticia Ntumba okwa lombwele Nampa ta ti tango oya li ashike aashona mokulanditha, ndele ngashingeyi oya ninga oyendji. Ndele nando ongawo ongeshefa ota ti ota yi ende nawa.Ngashingeyi opena aakiintu yeli omilongo 30 mboka haya landitha iihape mpoka noshowo iiyimati okuyeleka na yatano mboka ya lipo sho opo ongeshefa ndjika ya tamekele. Oyendji ota ya landitha okashako koonyanga, kiikapa , kookilograma 10 ka landwa koodola 25 yo ta ya gwedha ko ntano nokukalanditha ihe koodola 30 omanga okashako komanyangwa omashona ohaka landithwa koodola 20 sho ya gwedha ko oodola ntano kondando ndjoka yo ye kalanda. Ntumba okwa ti hela tuu ya tameke okulanditha ngashingeyi oye li nawa no ta ya vulu oku futila oyana osikola noshowo oku ya landela iikulya niimaliwa mbyoka haya mono mokulonga ngaaka.