Aakiina yofabulika yothewa yiifekela ya holoka mompangu

AAKWASHIGWANA yaali yaKiina mboka ya kwatelwe kopolisi mEtitano oya holoka mompangu omaandaha.Aakiina mbaka oya kwatwa sho ta ku tiwa oya longo nokulanditha othewa ya holela othewa yokwoopaleka iiyogomwa yedhina MAQ.

Aatamanekwa mbaka ina ya pitikwa ya zemo moshitopolwa shaVenduka ina ya pewa epitikilo komukonakoni gwoshipotha shawo.Ndika olya li limwe lyomiinakugwanithwa ya gandjwa opo ya pewe eifutilemo kompangu yaMengesitarata Omaandaha.Oonaku tamanekwa mbaka Chen Bin na He Jian Guo oya kwatwa ‘moshilando shaaChiina’ moshitopolwa shoofabulika muumbangalantu waVenduka.Oya tamanekelwa uulingilingi noshowo okutaaguluka ompango yuuthemba wokushitapo oshinima.Opolisi yaNamibia oya ti oya adha kutya aantu mbaka oya li taya longo othewa yoshifekela yaMAQ ya tulwa moshipakete shoograma 250 noku yi landitha.Oshipotha shawo osha undulilwa ko 10 ga Novemba.Oshinakugwanithwa oshikwa wo shokwiifutilamo osho shoka kutya oye na okugandja oopasporta dhawo kepangelo.Omukalelipo gwawo gwopampango Boris Isaacks okwa ti shika oye shi ninga nale.Chen ngoka oye mwene gwofabulika ndjika okwiifutilamo noodola 15 000 omanga nakutamanekwa omukwawo Guo iikulilemo noodola 10 000. Moshifo shomaandaha otwa shangele kutya mbaka yaali oyo ooyene yofabulika ndjika, ndele pahapu dhomutolokeli gwaambaka ,okwa lombwele oThe Namibian kutya Chen oye mwene gwofabulika omanga Guo omuandjaganeki nenge omulandithi.Manga omutaleli gwopolisi omusamane Rector Sandema gwoshikondo shopolisi yokukeelela uulunga wopaipindi okwa ti nonando ekwatathano lyaantu mbaka lyopangeshefa ina li tothwamo naanaa, ota shi vulika aantu mbaka ya pambathana..Shoka shishiwike ngashingeyi osho ongushu yoothewa ndhoka dha adhika pofabulika, shoka Sandema a koleke kutya ongushu oyi li pokati koodola 500 000 noma 700 000.Ongushu ndjika ina yi kwatelamo oothewa ndhoka dha kuthwa kongeshefa ya Guo noshowo koongeshefa dha yalwe mboka woo ta ya konakonwa molwa oshinima shika.Opolisi otayi konakona woo oludhi lwothewa yimwe yedhina QWA ndjoka woo yafaathana naandjika ta yi konenenwa.Pompangu omaandaha oshifo shika osha pula Rong Qing Xu amushangandjai gweHangano lyAanangeshefa ya Chiina moNamibia ndyoka ha li kambadhala okulonga aaChiina ya simanekathane noshowo ya simaneke aaNamibia noompango dhamo.Xu oye woo a li ta tolokele aafekelwa mbaka yaali pethimbo lyokuholoka kwawo mompangu.Okwa lombwele oThe Namibian kutya okwa li ape Chen na Guo omayele opo ya longele kumwe nopolisi ya Namibia noku yi pa uuyelele auhe mboka ta yi pula.’Ita ya vulu we okuholama, molwaashoka oya kwatwa nale’ta ti ngaaka uvite nayi keihumbato lyaambaka yaali.’Tse aanangeshefa aaChiina otu li muka okulonga iimaliwa noshowo oku tunga uukuume nomakwatathano,’ Xu ta ti no ku indila aakwashigwana kaa ya talele aaChiina ayehe moshitalelo shaamboka aashona yo wala oyo taya teya ompango nelandulathano.’Tse otwa tsompinge niilonga yi li kondje yompango, na otu shishi kutya shika ka shish oshinima oshiwanawa.Omolwaasho aluhe ohandi longitha omutseyimpango gwandje!’ ta gwedha ko ta ti ehangano lyaanangeshefa oha li gandja woo omayele kiilyo yalyo opo aluhe ya longe pampango ngele ta ya shangitha oongeshefa dhawo.Xu okwa ti mwene gwo fabulika Chen ota ti ofabulika okwe yi landa komuntu gumwe konyala oomwedhi ntano dha piti, na ka kwa li eshiwo ngele othewa ndjoka ta longo moka oyo shi fekela.’Moku shi tala kwandje ota shi vulika ngiika pamwe a nyokomwa kugumwe,’ Xu a ti noku gwedha po kutya’oye na oku ka gandja ombili kokampani ndjoka oyo yene yedhina MAQ, ngele ha sho yo ota ya ka futithwa, na ota ye keshi vula ngiini’.Chen okwa kala a piyagana ethimbo alihe sho e li mompangu Omaandaha nethimbo alihe okwa kala ta henuka omafano sho kwa li ta thanekwa kaatoolinkundana.Omutaleli Sandema okwa koleke kutya ina pa kwatwa we yamwe sigo oompaka, ndele aapolisi otaya tsikile omakonakono gaawo.