Aakengeleli momapandaanda

AALUMENTU yatatu oya kambadhala oku landa epakapaka komukwashigwana gwomoVenduka oshiwike shayi, taya longitha okawe kiifekela noshowo ondumba yiimaliwa ya Zimbabwe yaana ongushu yasha.

Aalumentu mboka oya ethiwa kopolisi konima ashike sho omiya dha shinana dhe ya keelele opo yaa yuge omulandithi gwepakapaka moondunge oombwanawa. Omupopiliko gwopolisi okwa ti nonando opolisi oya keelele aalumentu mboka kaaya longe shoka ya li ya dhiladhila, mbaka oya ethiwa ya ye oshoka inaya pogola, ina ya taaguluka ompango molwaashoka kaya li ya longo shoka ya li ya dhiladhila oya li ashike ya kambadhala okushilonga.Aalumentu mbaka yatatu ayehe aaNamibia oya li ya thikama mpoka konyala ya yuge oshihakanwa shawo, Petrus Vermeulen poshipangelo sha Katutura omanga , nguka a li ta hokolola ehokololo lye.Opolisi oya yi naalumentu mbaka kosasiona yopolisi ya ka tale ngele ota ya vulu okukwatwa ndele mbaka inaya ningilwa oshipotha omolwa uudhigu mboka wu lipo oku ya pangula nenge oku ya tamaneka.Opolisi oya londodha oshigwana shikale sha tonata unene ngele tashi ningi omatseyitho gaashoka tashi landitha unene tuu iyenditho nenge iilandithomwa yilwe.Oshiningwanima shika osha ningwa konima sho Vermeulen a tseyitha ta landitha epakapaka moshifo, okwa li a dhengelwa ongodhi kaalumentu mbaka.Ota ku fekelwa kutya mbaka oha ya lesha iifo esiku kehe noku tala mboka ya ninga omatseyitho opo ya tale kutya oyeni yomuyo taya vulu oku ninga iihakanwa. Vermeulen yo na yina oya li ya ningi etseyitho lyoku landitha omapakapaka gaali, naayehe oya li ya dhengelwa ongodhi kaalumentu mbaka. Otashi vulika woo kutya mbaka oya dhengele aantu oyendji pethimbo lyoshiwike nonkambadhala oku ya yuga pamukalo ngoka.Vermeulen okwa tsakanene naalumentu mbaka noye mu fala po Rhino Park oye mu lombwele opo a ka tsakanene nomulumentu omutitatu ngoka aniwa ondohotola poshipangelo sha Katutura.Po Katutura Vermeulen okwa ulukilwa oshipandi shiimaliwa aniwa ta ku tiwa oodola omayovi 100 000. Iimaliwa nani oya Zimbabwe ya tulwa efo lyoodola ethele kombinga nombinga.Vermeulen okwa ulikilwa woo shoka kwa tiwa aniwa uuwe, na okwa pulwa ngele oku shi aantu mboka ya hala oku landa mboka.Vermeulen okwa ti okwa mono kutya uumanya mboka owii fundja oshoka kamwe komuwo oka li ka tenda, okwa dhengele omumwayina ngoka eya nopolisi, naasho aalumentu mbaka ya mono opolisi oya nuka mohauto eta ya fadhukapo, ya thigi po uuwe mboka momwiidhi.Opolisi oya fala aalumentu mbaka kosasiona yopolisi ya Namibia ndele hoka mbaka oya ethiwa konima yokathimbo. Nonando mbaka oya li yena uuwe wiifundja, Vermeulen okwa ti opolisi oya ti ita yi vulu oku ya kwata oshoka ina ya pogola sha.Omupolisi gumwe okwa ti mbuka uuwinayi mboka wa guma aantu yaana ondjo. Okwa ti osha pumbiwa okulonga oshigwana shi angale aantu mboka ta ya holoka ya fa yena iimaliwa ndele nani yo oya hala okuyuga moondunge oombwanawa nenge mbaka oya hala okugoyapaleka iihakanwa yawo nopamukalo nguka ota ye ya yugu kaa ye weteko. Omasiku ga piti omukalimo gumwe moVenduka konyala a yugwa ohauto ye yoLand Rover pamukalo ogo tuu ngoka gwoombapila dha tulwa efo lyoodola ethele kombanda nokohi noshowo iifekela yuuwe.