Aakatyali ya landa oowato dhawo kOkavango

AAKALIMO yomOshikandjohogololo sha Katyali moshitopolwa sha Shana, mewiliko lya Kaansela gwawo tate Joseph Mupetami, oyi ilandele oowato ndatu dhokulongitha pethimbo lyomvula okutaaguluka omilonga niishana yomeya.

pEthimbo ta ulikile iikundaneki oowato ndhoka ndatu poCOSDEC pOndangwa Omaandaha, Kaansela Mupetami, okwa ti kutya oowato ndhoka ndatu, oye dhi landa kOkavango koodola N$3100 omasiku ga zi ko.Yimwe yomoowato ndhika, onene yi vule oonkwawo mbali, na tate Mupetami okwa ti kutya edhina lyayo Onamungundo Omunene, ano Kuku Victoria Kadhikwa na oku na oku yi fala kumbushe e ke yi kwate oshowo kOmukwaniilwa tatekulu Immanuel Kauluma Elifas e ke yi tale manga inayi ya miilonga yokukataagulukitha oshigwana omilonga niishana yomeya moKatyali nokiitopolwa iikwawo hoka oowato ndhika tadhi ka pumbiwa pethimbo lyomvula.Ndjoka onene, Kaansela Mupetami okwa ti otayi vulu okuhumbata aantu ya hetatu sigo omulongo omanga ndhoka oontshona mbali tadhi vulu okuhumbata aantu yane sigo yahamano kumwe niinima yawo mbyoka kayi shi iidhigu unene.Mupetami ta ti, oomvula omulongo nasha dha pita po, Aakatyali kumwe naanafaalama yawo oya kala nokugongela oshimaliwa shi na sha nUunafaalama, unene sha li shi na sha netotepo lyomatale gomeya.mOshiketha nee moka, omusamane Mupetami, okwa ti omo ya kutha oshimaliwa shimwe noya ka landa ngeyi oowato ndhoka ndatu kOkavango.Mupetami ta ti oya pumbwa natango mbali nokwa ninga etokolo ndhoka mbali e ke dhi lande noshimaliwa tashi zi mondjato ye mwene.Ekwatathano naamboka haya ningi oowato ndhoka kOkavango, Mupetami okwa ti kutya, oye li ningilwa kOmbelewa yOshitopolwa sha Shana, unene tuu kOmunambelewa Omukuluntupitithi gwOshitopolwa sha Shana tate John Kandombo naakwatheli ye.Tate Mupetami ta ti konima sho ye dhi landa ngeyi, oya indile Etanga lyEgameno lya Namibia li ya kwathele li ya etele oowato dhawo ndhika kOkatyali nolye shi ningi pwaa na omaongaongo.’Aakatyali otatu pandula noonkondo Etanga lyetu lyEgameno lya Namibia molwoshilonga oshiwanawa shika ye shi tu longela. Otatu pandula wo Ombelewa yOshitopowla shetu sha Shana sho ye tu longekidhila nawa elando lyoowato dhetu noshowo Elelo lya Kavango ndyoka lya li li na ekwatathano ewanawa natse moshinima shika. Tatu pandula wo omusamane Masake ngoka e tu ningila oowato dhetu ndhika.Ngashingeyi otu li twi ilongekidhila omeya gefundja, inashi fa we nale, sho twa li twa tala ashike kEpangelo.Aanahambo naanafaalama yetu, ngashiingeyi otaya ka ya koohambo dhawo noowato ndhika mpoka tashi vulika noshigwana otashi ka vula ngashiingeyi okutaagulukithwa omilonga niishana mOshikandjohogololo shetu sha Katyali nosho tuu, uuna kwa lokwa unene niishana yuudha omeya,’Kaansela Mupetami ta ti ngawo nokugwedha ta ti yo inaya hala ashike okutegelela komakwatho gEpangelo, ihe oya tokola ya tsakaneke Epangelo mondjila nokwiikwatha wo yene ngeyi.Mupetami ta ti, nashi uvikwe ko nawa kutya oowato ndhika kadhi shi ashike dha Katyali, ihe otadhi vulu okweehelwa nokulongithwa wo kIitopolwa yilwe ya dhengwa komeya gefundja. Mupetami ta indile nee kAakatyali ya tonatele nokudhiginina oowato dhawo ndhika nawa, yo wo taye dhi sile oshimpwiyu noku dhi longitha nawa.Kaansela gwOshikandjohogololo sha Mpundja mOshitopolwa sha Shana, tate Adolf Uunona,ngoka e li omushiinda sha Katyali, na ye opo a li wo peuliko lyoowato dha Katyali pOndangwa nokwa ti kutya nayo oyi ipyakidhila nokulanda oowato dhawo palongelo kumwe nAakatyali nElelo lyawo lya Shana naandjoka lya Kavango.’Elando lyoowato kutse yene, oshinima sha pumbiwa noonkondo oshoka itatu kala ashike twa tala kEpangelo. Epangelo nali tu kwathe mpoka tse itatu vulu nandenande okwiikwatha tse yene, ashike mpoka tatu vulu, natu ikwatheni tse yene.