Aakalimo yomo Kaiti ya indilwa ya longe nuudhiginini

MEYA gwa Kaiti okwa indile aakalimo yomo Kaiti ya ethepo omukalo gwokuhehela poshilando shoka.

Moses Titus okwa ti olundji omanongelo, omahala galwe goshigwana, noshowo oohandimwe oto adha ya tya oombapila dhomahehelo dhimwe dhuukithwa kelelo lyoshilando opo shi yambidhidhe momukalo nguka nenge pashimaliwa. Okwa indile mboka ha ye shi ningi ye shi hulithepo, nopeha lyaashika ya etepo omathaneko gopangeshefa, ngoka, itaala taga fala mekandulepo lyomukundu notaga kalele okukwathela omanongelo noshowo omahala galwe goshigwana. Titus eindilo ndika okwe li ningi pethimbo lyoshigongi shoshigwana omaandaha. Okwa dhimbulutha oshigwana she kutya osha ninga omukalo ndjigilile kutya oto mono aanona yomanongelo taya hehela poositola. Oshinima shika okwa ti osha ninga shesiku kehe. A ti moku gandja odola yimwe komunona ngoka itashi kwathele oshigwana. Opwa pumbiwa oku yanda okudhikapo oshigwana shaaheheli, na opo shika shiningwe kehe gumwe oku na okutula okwaako konkambadhala ndjika. Titus okwa indile woo aakalimo yomoKaras ya yambidhidhe ngoloneya gwoshitopolwa shoka Bernardus Swartbooi melalakano lye oku yambulapo omahupilo nekoko lyago moshitopolwa. Okwa ti aakwashigwana na ya yambidhidhe omadhiladhilo ngoka nooprograma ndhoka moshitopolwa. Okwa ti na ya ye kumwe ongo ongundu yimwe ya kwatathana opo ya ninge oshitopolwa sha Karas oshitopolwa shakola noshotango meyokomeho.