Aakalimo yi ipumu nopolisi poHerero Mall

PEHALA lyomalandithilo lyedhina Herero Mall opwa holokele evundakano ongulohi yetitano konima sho ongundu yaalandi yamwe noshowo ooyene yomalandithilo mpoka yi idhenge mumwe nopolisi.

Oshiningwanima shika osha holoka konima sho ongundu yaantu yamwe pehala mpoka aniwa ya indike opolisi opo yi edhile oondingosho dhawo ndhoka tadhi longo dhaana oombapila.Ehala ndika olya ningi esiku miikundaneki konima sho kansela gwoshitopolwa sha Khomas, Ambrosius Kandjii a li a nyenyeta namwene gwondingosho yimwe pehala mpoka, noshowo nee onkatu ndjoka ya kuthilwe kopolisi okushonopeka elanditho lyomalovu lyaali paveta. Ehala ndika olya li ishewe lya pewa uuthemba okulonga ashike sigo otundi ontiheyali kongulohi. Etitano kongulohi aapolisi yatatu sho ya li ya kambadhala okweedhila oondunda ndhoka oya tsakanekwa kooyene yoondunda ya geya noshowo aalandi yaana ombili omolwa oshinima shoka.Oyendji yomaantu mbaka oya pula opolisi opo yi ya pe oombapila ndhoka tadhi ya pe uuthemba okupata oondingosho ndhoka. Opolisi oya thigipo aniwa ehala ndyoka nokugaluka yatya ongundu onene yopolisi. Eholoko lyongundu onene yopolisi aniwa olya keeta mpoka kutya opwa tukuka okwaa uvathana, sho ooyene yoondingosho yiindike opolisi opo yi pate oositola dhawo. Opolisi oya li ya thiminikwa yi longithe omuku gwomahodhi opo ya halakanithe ongundu ndjoka yaantu.Olwithi ndoka lwomahodhi otaku kundanekwa kutya inalu guma ashike aakalimo po Herero Mall ndele olwa yi nomomagumbo ngoka geli popepi nehala ndyoka nokweehameka aanona naakulupe. Omukalimo gumwe ngoka ha landa omayakulo po Herero Mall okwa pula kutya omolwashike opolisi ya shoneka nenge ya hogololamo ashike ehala ndika, yo ihaayi ka edhila oondingosho dhomepandaanda lya Eveline. Komufala gwopevi gwopolisi, Traugot Nghambe okwa ti opolisi oya li ta yi longo iilonga yawo yoshito yokupatolola pehala ndyoka sho aniwa ya kondekwa, onkene oya li yina okwiithana ekwatho opo yi vule okumangululwa mekondeka moka ya li. Sho nee omwaalu omunene gwopolisi gwiithanwa ogwa thikile tagu umbu olwithi lwomahodhi opo ongundu ndjoka yi halakane. Okwa ti pethimbo lyoshiningwanima shika omuntu gumwe okweehamekwa na kapwali pwakwatwa omuntu.