Aakalimo yamwe sigo oompaka kayena uumutse

AAKALIMO yamwe mboka ye ya moshilongo muka konima yomimvo odhindji ngashingeyi ,sigo oompaka ka ye na omikanda dhopashigwana dhaNamibia. Omutotimpango gwoSwapo megumbo etiyali lyopashigwana , Frieda Siwobe okwa ti yamwe yomaantu mbaka oya fadhukile po iita yopashigwana mbyoka ya li moAngola omimvo dha piti, noyendji ka ye na edhiladhilo lyoku shuna hoka.

Siwobe okwa ti aantu mbaka oha ya kutha ombinga miinima ayihe yopashigwana, mbyoka ha yi longwa kepangelo, mwa kwatelwa nokuhogolola. Ndele sigo oompaka aantu mbaka inaya shangithwa uumutse, oonzapo dhomavalo kuUministeli wIikwameni.Okwa ti ngiika shika ina shi ningwa molwaashoka mbaka oya pelwe uumutse pethimbo lyuukoloni wa li wa tulwa onomola ndjoka ta yi ulike kutya mbaka oya za koAngola, nomolwa shika, epangelo lya Namibia ina li vula oku ya pa uumutse uupe wa Namibia.Okwa ti oku na omaipulo kutya sigo uunake Namibia ta kala a tala aantu mbaka ongo oondjendi, nonando yo oye li muka ethimbo alihe.Omutotimpango gwo Swapo okwa ti yamwe yomaantu mbaka oyo aahogololi oyendji miikandjohogololo yimwe, noyendji yomuyo aakokele.Okwa ti ishewe oyana yaantu mbaka oyi ipyakidhila nokuhumitha komeho oshilongo miimpungu ya yooloka, ndele aakuluntu yawo oya talika ko ongo oondjendi.Siwobe okwa ulike kutya Aangola ha yo ayeke taya mono iihuna pomukalo nguka ndele naamboka haku tiwa ooRiemvasmakers, ya zile ko South Africa omimvo odhindji dha pitapo noye li pomahala ngaashi, Gibeon, Luderitz,Khorixas,na Swakopmund.Okwa ti ishewe aantu mbaka ka ye na omikanda dhopashigwana, na okwa indile Uuministeli Wiikwameni wu tale oshinima shika nomeho omanene. Siwobe okwa popi ndhika pethimbo lyoonkundathana kombinga yomutengenekothaneko gwiimaliwa yuuministeli mbuka gwomumvo 2010-2011.