Aaiyambi mOpolisi otaya ka fala omukundu gawo komupresidende

MBOKA ya li nale aaiyambi mOpolisi ya Namibia mOshakati oomvula dha thika puheyali noya thigwa po komakuto taga kalele, otaya ka fala euvonayi lyawo kOmupresidende Hifikepunye Pohamba nosho wo Ominista yEgameno Nickey Iyambo Aaiyambo mbaka aakulu -ya ningi ethimbo ele ya yunga oontanda komeho gOombelewa gwoshitopolwa sha Shana, oya li yi ithanwa ohela kOsasiona yOpolisi opo ya ka pewe eyamukulo lyawo lya li aniwa lya zi kOombelewa oonene dhOpilisi kOvenduka.

‘Sho twa thiki pOombelewa dhOpolisi, otwa ulukilwa ombapila aniwa ya za kOombelewa oonene dhOpolisi kOvenduka, tayi yelitha kutya aaiyambi yomadhina ga nyolwa mo oya ndopa okukutwa mOpolisi yaNamibia.
Oyi indilwa aniwa opo ya kale ya ganda uukalata wawo mboka una oonomola dhawo dhiilonga,’ aaiyambi mbaka osho ya lombwele The Namibian ngaaka ohela.
Shika oshe etele nee aagundjuka mbaka ongeyo nokuthiga po oshigongi shika, e taya ka kala ya pondje.
‘Tse otwa tokola kutya ita tu ka gandja nande uukalata mbuka wiilonga, sigo ethimbo ndjoka ta tu pewa omukanda gwekuto lyetu miilonga.
Otwa tokola woo kutya out na okutsikila nekanka na ota tu ka kutha olweendo okuya kOvenduka opo tu ka gandje omanyenyeto getu kOmupresidende nosho wo kOminista yEgameno,’ Omupopiliko gwawo osho a lombwele aanankundana ngaaka, sho ya pulwa oshike yi ilongekitha oku ka ninga po kombinga yoshinima shika.