Aaipandayaamiti ya tokola ya tunge ondjila yawo kuyo yene

AAKALIMO yomIipandayaamiti noshowo yomomikunda ngashi Oshoogolo, Omafo, Onyelelo, Oheke, Ombalala, Ondjamba, Onalunkono, Onangodhi, Ontana, Oshikuyu nOputu moMusati, oyi ipyakidhila nokutunga ondjila yawo tayi zi mondjila onene ya Shakati nOmungwelume pOmbalala, tayi taaguluka oshana shIipandayaamiti kuuzilombangalantu nokuya poosikola dhIipandayaamiti.

Aakalimo otaya ti kutya ondjila ndjika oya pumbiwa noonkondo molwashoka okuza komikunda odhindji dha tumbulwa metetekelo, omuntu ito thiki ko nuupu kOsenda ndjika yIipandayaamiti uuna kwa lokwa nawa noshana shIipandayaamiti shuudha omeya, unene tuu ngoka gefundja.Hashi kelele aanona, naalongisikola ya thike kOsikola, aakwashigwana mboka taya ehama, ya thike kOklinika, Ooitaali ya thike kOngeleka, aakulupe ya thike kOpenzela yawo, aavali ya thike kiigongi yaavali kOsikola noshowo yilwe.Edhilaadhilo enene ye na po olyo ndyoka kutya ondjila ndjika uunalumwe yi ka ze po wo pOsikola yIipandayaamiti mpoka, tayi piti pOngeleka ya Katoolika ka Roma pUukwanatshikare ya thinda sigo omwaandjoka ya Shakati nOshikuku lwopEetshuungu nEenampila mpoka. Kakele kOsikola ndjoka yi li pIipandayaamiti mpoka, opu na wo Ongeleka ya ELCIN noshowo Oklinika yEpangelo.Aakalimo, ohaya longo nee niimbale, uutololi, iihupulo , oombike, nomapanda. Oye na wo uutemba tau hilwa koondoongi noongombe, tau tutile evi mpoka tapu ende ondjila, ano taya tungu ondjila ngawo.Omambakumbaku nago wo otaga longithwa mokututa evi nuutemba nenge niikoto yago.Omolwiilonga yatya ngeyi ya kwata miiti noya simana noonkondo, aakalimo oya hogolola Okomitiye ya thikama maantu ya za momikunda dha tumbulwa metetekelo, opo ya unganeke iilonga mbika nawa. Okomitiye oya hogolola nee omusamane Matheus Nambinga oye a kale Omunashipundi gwayo.Omunashipundi gwOkomitiye ndjika okwa lombwela Oshifo shika kutya iilonga yondjila ndjika, tayi longwa paikako, oya tamekele nayo meti 8 June omvula ndjika 2009. Taya ti kutya oshikako shotango oku yi taagulukitha oshana oshinene shIipandayaamiti noku yi thikitha pOsikola yIipandayaamiti, okuzilila kuuziombangalantu woshana shoka nOsikola ndjoka, yo iikwawo tayi landula ko nee.Tate Nambinga ta ti, oshigwana osha tokola okumanitha okatopolwa hoka kondjila yokombanda yoshana nokuthika pOsikola yIipandayaamiti omanga omvula inayi tameka okuloka. Pokati koshana, tate Nambinga ta ti, oya hala okutunga po ontopa yokweendela omeya opo kaga kungulule po ondjila yawo ndjika. Ta ti oya pumbwa nee aasihenda ye ya pe omagano gOopeipa, ano dhOominino ominene dhOsamende, dhi na omambululu omanene, ga fa oolinga, gokweenda omeya pontopa mpoka noshowo poontopa dhilwe taye ke dhi tunga molweendo lwiilonga yetungo lyondjila yawo ndjika.Tate Nambinga ta ti kutya Oprojeka yawo ndjika sho ye yi tameka oye yi lombwela Kaansela gwawo gwOshikandjohogololo sha Etayi, ano tate Bernadinus Shekutamba Shikongo noku mu indila e yi zimine, ano yi ziminwe pambelewa kOmbelewa ye ndjoka yi lile po epangelo puEtayi.Ye mu shangela Ombapila moka taye mu tseyithile Oprojeka yawo ndjika noya tula mo wo oompumbwe dhawo neindilo kOmbelewa yi ya kwathele moompumbwe ye dhina mokutunga Oprojeka yawo ndjika onene notayi ya pula oshindji. Unene ya lombwele Kaansela Shikongo kutya opo ya endelelithe nokumanitha iilonga yawo yoshikako shotango, oya pumbwa oolinga dhosamende dhokutungitha ontopa moshana shIipandayaamiti dhi li omulongonantano (15), ooshako dhosamende dhi li ethele (100), uumanya wokuningitha okaungulita wookubike hamano, iitenda noondhopi dhokutungitha ontopa nuushako kau na sha wokutula evi wu li omathele gaali (200).Ongetameko, tate Nambinga ota ti kutya aakalimo yamwe yomomikunda dha tumbulwa metetekelo, oya umbile oshimaliwa shi thike pOodola dha Namibia N$1500. Ta ti omathele gahamano (N$600) oga longithwa nale mokututa omamanya, omanga OoN$900 yi li kOkambo kawo kOmbaanga, hoka ya tota po omolu Oprojeka ndjika.Okambo okOmbaanga ya Windhoek mOshakati; Edhina lyako olyo Iipanda Yaamiti Road Project. Onomola yako, ano Oakaunda yakooyo 2000221153. Aakalimo yaali oya uvaneka taya ka gandja Oodola dha Namibia omathele gaheyali. Nambinga ta gwedha po ta ti oya indila wokOshikondo shokutunga oondjila noku dhi sila oshimpwiyu, ano ku tate Titus Temba, ye ya kwathele mokutunga ondjila yawo ndjika, unene tuu ye ya kwathe oolinga dhosamande dhokutungitha oontopa.Tate Nambinga, ngoka a ti kutya onomola yOselefona ye oyo 0812959641, ota indile koshigwana oshisihenda shi ya kwathele mOprojeka yawo ndjika onene notayi pula oshindji. Ta lombwele aakalimo yomIipandayaamitinoyomomikunda dha tumbulwa metetekelo ye li niilonga kuushimba nosho tuu, ano kIitopolwa yi ili noyi ili ya Namibia nopondje yoshilongo, ya uve kutya kegumbo oku na Oprojeka yokutunga ondjila ndjoka, ya pumbwa ekwatho, ano eyambidhidho enene, notaya indilwa nee ya yambidhidhe.