Aailongi mu UNAM yomoNooli ye li 276 ya pewa oonzapo

AAILONGI ayehe kumwe ye li omathele gaali omilongoheyali nayahamano (276) yomoNooli mboka ya kala tayi ilongo mOshiputudhilo shOpombanda sha Namibia (UNAM) oya pewa oonzapo dhawo sho ya pita nawa eilongo lyawo mOshiputudhilo shoka omvula ya zi ko, nomokati kawo omu na gumwe ngoka a mono onkatu yUudokotola mUunongo wUupangi, i ilongela moUNAM yomoNooli mOshakati.

Oshituthi shegandjo lyOonzapo shika, sha ningilwa mOsenda yOmaulikilo gIipindi mOngwediva, osha li sha popithwa kOmupresidende Hifikepunye Pohamba, ngoka wo a gandja oonzapo kAailongi mbaka ya UNAM, kOmukokolipresidende Omundohotola Sam Nujoma, ngoka wo e li Omukuluntu gwOshiputudhilo shOpombanda sha Namibia (UNAM) noshowo kOmuprofesore Lazarus Hangula, ngoka e li Omukuluntu gwOpevi gOshiputudhilo shOpombanda sha Namibia (UNAM) noshowo kAaprofesore yamwe.
Aalongwa mbaka yomwaalu gwo 276 oya thikama unene mAalongisikola mboka taya vulu okukalonga mOoseko nomOosikola dhOoprima moshitopolwa shomoNooli. Mokati kawo omu na wo Aapangi mboka wo nayo ya piti eilongo lyawo lyopaupangi notaya vulu okukalonga mIipangelo noshowo kOoklinika.
Omu na wo aalongwa oyendji mboka yi ilonga kOshitayi sha UNAM kOgongo mboka ya pita eilongo lyawo noya mona oonzapo dhawo mUunamapya, mIimuna noshowo mIikwakuti ano mEgameno lyUunshitwe-lyiihwa nosho tuu. Aalongwa mbaka otaya ka tumwa nee kOombelewa oonene dhUunamapya dhOpaitopolwa moshilongo noshowo kOoprojeka dhoowawa noshowo ndhoka dhOmapya golwishi.
Metitano omo tuu moka, omwa egululwa wo Oshitayi sha UNAM shUuwindjinia nOmauyelele gOpaunongononi, ndjoka ya tamekelwe okutungwa mOngwediva okuza momumvo 2006 noya egululile omiyelo dhayo kuyele nuumvo, yi na aailongi ye li omilongontano nayatano (55), mboka pa ndjokonona oyo yotangotango taya tamekitha po Oshitayi sha UNAM shoka.
Oshituthi shEgando lyOonzapo shika sha li tashi wilikwa kOmukuluntuwiliki gwOshitayi sha UNAM oshinene moNooli mOshakati me Paulina Uugwanga, osha egululwa nEgalikano kOmusita gwa Gloria Dei ELCIN mONgwediva tate Josef Avia.
Omupehakuluntu gwa UNAM Omupfofesore Hangula oye a popi tango sho ta taamba ko ayehe kOshituthi shika nokwa yelitha shoka sha ningwa po naashoka tashi ka ningwa po. Taku landula ihe Omukuluntu gwa UNAM Omundohotola Sam Nujoma, ngoka a ti kutya Omoto ya UNAM oyo ‘Elongo, Iilongayakulo nEhumokomeho.’
Omundohotola Nujoma ta ti muule woomvula 16 dha pita po , UNAM okwa longa oshigwana shika, shoka sha eta po aantu ya longwa noya kutha ombinga onene meyambulopo lyEmona lyoshilongo. Ta ti aalongwa mbaka taya mono oonzapo nena otaya ka ngwedha kuyakwawo omayovi nomyovi mboka ya longwa mOshiputudhilo shika noshowo mwiikwawo, na oyo wo otaya ka kutha ombinga onene mehumithokomeho lyemona lyoshilongo naantu yamo.
Nande ongawo, Omundohotola Nujoma okwa ti kutya Namibia, onkee ngaa a pumbwa aantu ya longeka nawa noya pita nawa ye na ontseyo ya gwana miitopolwa niitopolwa yopaunongononi. He yOshigwana ta ti omolwaasho ho mono Namibia taka ehela Aanuunongo miinima yi ili noyi ili pondje yoshilongo, ngashi unene mUunamiti nomUuwindjinia nosho tuu, manga ngaa ta putudha ye miilongwa mbika.
Nujoma ta ti omolwaasho wu wete iilongwa tayi ende tayi indjipalithwa nokutamununwa mo moUNAM moka. Ta pandula ewiliko lya UNAM sho lya eta po Oshitopolwalongo shUuwindjinia nUuyelele wOpaunongononi mOngwediva shoka sha tameke okulonga kuyele nuumvo, sha tameke naalongwa ye li 55 mboka ya talika ko oyo Uupionia wOshiputudhilo shoka, mu yo mu na aakadhona ye li 15.
Omundohotola Nujoma ta ti shika oshinima oshinene nosha simana sha ningwa po. Ta tseyitha wo kutya momumvo tagu ya 2010, mu Febuluali, otaku ka tamekiwa nOsikola yUunamiti, nosha yela kutya oshilongo shetu otashi ka kala shi uvite uuntsa sho tashi ka kala nOoindjinia nOondohotola dhasho dha longwa moshilongo shawo yene.
‘Otandi pandula Omupresidende Pohamba nEpangelo lye omolu eyambidhidho enene kOoprojeka ndhika mbali oonene, oshoka adhihe mbali odhi li oshipatululo oshinene mokwaadha ondjodhi yetu yomumvo 2030,’ Nujoma ta ti ngawo.
Omupresidende Pohama okwa pandula sho a ithanwa e ye a gandje oonzapo pambelewa kOonakupita ayehe mboka ye li 276 moNooli ya Namibia, okuza mpoka sho yi ilongo nawa nokupita nawa eilongo lyawo mOshitayi sha UNAM shomoNooli ya Namibia mOshakati. ta ti okuuvite nawa sho ondjodhi yEpangelo yokweeta Elongo lyopombanda koshigwana ya ninga yoshili.
‘Oshituthi shika shimwe shomiituthi yenyanyu noyeuvonawa konima sho twa kala nuudhigu woshiponga shomeya gefundja ngoka ga kala giihanena Onooli ayihe,’ Pohamba ta ti ngawo nokugwedha ko ta ti kutya okuuvite nawa sho Ooprograma dha UNAM inadhi kalwa moshipala koshinima shomeya gefundja.
Omupresidende Pohamba ta ti kutya yo ongEpangelo oya tagelela shi kale ngawo, kutya Omahangano ngashi gOoUNAM ngaka ga kuthe onkaytu ya kola melongo lyoshigwana omolu ehumokomeho lyoshilongo noshigwana shamo kumwe nemona lyasho. Ta ti UNAM oye gumwe gwomIiputudhilo yOpombanda moshilongo moka a egulula omiyelo dhe nokuninga po sha shomupondo mekelelo lyoluhepo, ekuthepo lyoshinima shokwaahumakomeho noshowo ekuthepo lyomikithi mokati koshigwana.
Omupresidende Pohamba ta ti manga oshilongo ninashi manguluka oshigwana sha Namibia osha li sha tindilwa Elongo kOmukolonyeki, ashike sho sha manguluka mewiliko lyOswapo, Swapo okwa tula po elongo lyopetameko tali dhengele, moka aalongwa taya longwa nokumona ompito yokukatsikila kOoseko noshowo kOosikola dhopombanda kOoUNAM hoka nosho tuu. Omupresidende ta pandula ayehe mboka ya mono oonzapo esiku ndyoka.