Aagundjuka yaaMbanderu ya hala okukwathwa kuPohamba

EWAWA lyaagundjuka lyelelo lyopamuthigululwakalo lyaAambanderu olya indile omuperesidende , Hifikepunje Pohamba opo a tye sha koshikumungu shelandulo koshipundi shelelo lyAambanderu shoka sha kala uule woomvula mbali ngashingeyi.

Oompata kutya olye ta landula nakusa omuleli gwAambanderu, Munjuku Nguvauva ngoka a manene oondjenda dhe mu January 2008 odha eta etopoko moshigwana shika.Omuperesidende gwewawa ndika , Cecil Nguvauva okwa ti yo kayena we ompito yimwe kaayishi ndjoka yoku indila omuperesidende, Pohamba opo eya pe omayele noku ya ulukila ondjila.Okwa ti woo yo oya ekelahi omushangwahokololo ngoka gwa tulwa kumwe kokangundu hoka ka li ka ulikwa kOminista yOmalelo giilando nomagumbo , moka mwa indilwa opo Keharanjo Nguvauva oye ando a landule nakusa he ongo omuleli gwezimo lyAambanderu, ndele ha ku landulwa ando ku Kilus Nguvauva , Ominista yopevi Yoohi.Opwa kala oongundu mbali okuza tuu peso lya Munjuku Nguvauva, ndhika kehe yimwe oya li ta yi ambidhidha gumwe gwaambaka yaali.Cecil Nguvauva okwa ti okwa kumwa kutya omolwashike shoka sha konakonwa nokumonika kokangundu haka sha gandjwa ashike konima yomahogololo ga Novemba, ta pula kutya omolwashike sha kutha ethimbo ele. Nguvauva okwa ti woo okuwete aniwa pena uukume pokati kaanambelewa yUuministeli womagumbo na Keharanjo. Okwa ti okuwete Keharanjo oye ta ulikwa ongo oye omuwiliki gwAambanderu.Ongundu ya Keharanjo oya taamba omathaneko gokangundu kUuministeli womagumbo ndele ndjoka ya Kilus ina yi ga taambako.