Aagundjuka ya MDC 15 ya kwatwa po

BULAWO – Aagundjuka ye li 15 yongundu yo Movement for Democratic Change (MDC) mu Zimbabwe oya kwatwa po, sho oonkambadhala dhawo dhokutota po ehangano lyaagundjuka lyopashigwana dha piyagenekwa kiikolokosha yopapolitika.

Ookatalekonawa oya popi kutya omahogololo gokuhogolola aawiliki yOlaata yAagundjuka yOpashigwana mu Zimbabwe, oga li ga kalekwa sho pwa holoka iikolokosha pokati kiilyo yo Zanu-PF na MDC.
Opolisi oya li yi idhanwa yi pokati iilyo yoongundu dhika mbali pu Mahlahlandlela mu Bulawayo, mpoka aagundjuka ya li ya gongala mEtitano ya tota po Olaata yAagundjuka yOpashigwana.
Iikolokosha oya tameke sho aagundjuka ya Zanu-PF ya kambadhala okuboloka mboka ya MDC, kaya mone iipundi iinene, Ominista yOpevi yAagundjuka, Thamsanqa Mhlangu, ngoka naye opo a li – osho a popi ngaaka.
‘Opwa li iikolokosha mu Bulawayo molwashoka aagundjuka ya Zanu-PF oya uvitha nayi mboka ya MDC, opo ya hakane po iipundi ayihe. Olaata yAagundjuka yOpashigwana omu na okukala aagundjuka ayehe, ngashi naanaa mEpangelo lyOpaukumwe. Zanu-PF okwa ningi olaata yaagundjuka oshinima shopaati,’ Mhlangu osho a popi.
Mhlangu oku li oshilyo shongundu ya MDC, ndjoka tayi wilikwa kOmuprimaminista gwa Zimbabwe, Morgan Tsvangirai.
Olaata yAagundjuka oyi li kohi yUuministeli wAagundjuka na oyi na oshinakugwanithwa nokweeta po ooprograma tadhi eta aagundjuka ya kuthe ombika meyambulopo lyeliko lyoshilongo. – ZimOnline