Aagundjuka mOshana ya hala elunduluko melongo

AAGUNDJUKA ya za komahala ga yooloka moshitopolwa sha Shana oya hala melongo mu tulwe omalunduluko, opo ku humithwekomeho omapito gaanasikola moondondo dha yooloka mOsikola.

Pethimbo lyomutumba gwoonkundathana hadhi nigwa lumwe momwedhi kehe pEndiki lyaagundjuka mOshakati, aagundjuka mbaka oya kundatana iinima oyindji mbyoka ye wete ya pumbwa okulundululwa, opo elongo li vule okweetapo elunduluko maagundjuka. ‘Otwa kundathana notwa tokola kutya oya hala Uuministeli wElongo wu tuleelongo lyopaithano momulandu gwelongo (Career Choice) mo momulandu gwelongo moondono dhopevi. Shika otashi ka ninga oshipu ethimbo aanasikola taakamana osikola,oye shi nale kutya oya hala okukiilongela omaithano geni,’ Ndapewashali Matheus, Omunambelewa gwEhumithomeho lyAagunduka – osho popi ngaaka. Okwa ti akuthimbinga oya kundathana wo omulandu gwokuninga ootutsa dhomapulapulo gokutaambelamo aanasikola mboka ya hala okutaambelwa momandiki gomadheulo gontumba ogwa pumbwa okutalululwa. ‘Otwa mona kutya omulandu nguka nando oguli mondjila, otagu shundulwa kezimba lyuulingilingi. Aantu oyendji ohaya kala ye na iitsa iiwanawa ashike ohaya thigwa po omanga mboka inaa pita nawa taa taambwa. Shika osha pumbwa okulundululwa,’ Ndapewoshali ta tsikile ko ngaaka. Oonkundatahana dhika odha li dha unganekwa kehangano lyaagundjuka lyedhina Namibia Youth Ambassador (NYA) ndjoka lya lalakanena okuyambulapo onkalo yaagundjuka moshilongo opo yazemo momapandaanda noya mone iilonga. Yamwe yomiilyo yehangano ndika oyali aayendithi yoonkundathana dhika mboka ya kwatela komeho oonkundathana omanga aatali taa kutha woo ombinga noku pula omapulo. Alina Ipinge, e li oshilyo shs NYA – okwa ti ehangano lyawo ota li ningi oonkambadhala opo aagundjuka yi ilongekidhile oonkalamwenyo yokonima yOsikola. ‘Otwa hala elongo li kale tali dheula aagundjuka mboka taya vulu okukutwa miilonga konima yosikola nenge oku tota oshinima tashi etasha monkalamwenyo yawo. Onkee nando oonkundathana dhika oompe moshitopolwa,otwa hala okudhihumitha komesho opo dhi kale omukalo gwokuulika omaiuvo getu moompumbwe dhaagundjuka dha yooloka’, Listo Josef ta gwedha po. Omukalo nguka gwoonkundathana okwa totelwe omumvo gwaziko mendiki ndika, notagu kala omutumba gokugongala aagundjuka lumwe kehe omwedhi nokukundatathana oshipalanyolo shontumba. Iizemo yoonkundathana dhika ohadhi tuminwa kiikondo ya yooloka opo yi koonaakonwe.