Aafuthi yomapeko ina ya kwatwa natango

OPOLISI oya li natango ta yi kongo aafekelwa mboka ya yaka omapeko gatatu gomatamaneko okuza pompangu ya mengestrata moVenduka oshiwike sha yi.

Omukonakoni omukuluntu, Barry de Klerk okwa ti opolisi natango ota yi ningi omakonakono na oyi na etegameno oku mona eyamukulo mbala. Omapeko gatatu ngoka ga yakwa ogena uuyelele miipotha yina sha neyugo koonkondo, uufuthi mokuholoka omuntu a fa oye mwene gwoshinima noshowo oshinima shokukengelela. Okwa li kwa kundanekwa etitano kutya omapeko gatatu oga yakwa poombelewa dha mengestrata pokati kuusiku wetiyali nongula yetitatu. Aafuthi oya, yaka omapeko ngoka oku za mombelewa yomutamaneki pombelewa ndjika. Oya pitile mekende eshongo ndyoka lili pombanda yomweelo oku ya mombelewa ndjoka. Oshinima shika shuufuthi mboka osha ka monikwa ongula yetitatu lya yi, sho aaniilonga ya tameke iilonga.Ota ku tiwa onkalo yokwaana egameno lili nawa pohofa ndjoka oyo ta yi kumike uufuthi pehala ndyoka. Konima yuufuthi mboka, oshinima shegameno osha talwa nawa nehangano lyokupangela iikwamalusheno yegameno ngaashi omathano gopatiivii olya li ta li tulamo iilongitho mbyoka pehala mpoka etitano oshiwike shayi.