Aafekelwa 11 yakwatwa meyako lyoomiliona 6,4

S
IGO omaandaha opolisi oya li ya mono oodola 800 000 gomiimaliwa yoodola oomiliona 6,4 mbyoka ya li ya yakwa omasiku ga ziko.
Iimaliwa mbika ya li ta yi falwa koombaanga dhiipindi miilando yomoshitopolwa shErongo oya li ya yakwapo ta ku fekelwa kaagameni yomaliko mboka ya li ta ye yi fala komahala hoka.

Opolisi oya ti oya kwata oodola konyala 200 000 dha adhika mosheenditho sha he yomukonenenwa omunene moshinima shika, Simson Matias. Pahapu dhomukuluntu gwopolisi yOshana, Komufala, Ndahangwapo Kashihakumwa, omusamane Masole Shikata Matias okwa hili omeho gopolisi sho a holoka ena uumbanda peyinda lyopolisi ndyoka lya li lya tulwa mondjila onene pokati kOndangwa nOshivelo.Opolisi sho ya hadha nokutala tala mosheenditho she aniwa oya adha mo iimaliwa yoodola 184 570.Okwa kwatwa sho a li inaa vula oku gandja efatululo kutya iimaliwa ayihe yi thike mpoka okwe yi adha peni.Kakele kwaambika, opolisi oya adha ishewe oodola 100 000 poRundu, niikwawo oodola 600 000 po Grootfontein mehuliloshiwike.Poshilando sha Karibib aalumentu omugoyi oya holoka mompangu ya mengestrata pamwe naakiintu yaali mekwatathano nuufuthi mbuka.Aatamanekwa mbaka oya holoka okathimbo okafupi mompangu noshipotha shawo osha undulilwa komulongo ga Auguste nuumvo , omanga ekonakono lyopolisi ta li tsikile.Kashihakumwa oku na eitaalo kutya omasiku hamale opo opolisi yi kale ya kwata , omufekelwa gwotango moshinima shika, Simson Matias. Opolisi ota yi ti oya tegelela oku kwata aafekelwa yalwe mboka tashi vulika ye na mo onyala moshinima shika.Opolisi oyi itaala kutya oshinima shika osha longwa kelyenge lyaalongi yiikulumuna.Otaku hokololwa kutya esiku iimaliwa mbyoka ya kana, Simson Matias nomuniilonga omukwawo, Mathew Munsu Malumbano, ayehe ha ya longele ehangano lyokugamena omaliko lyo G4S oya li ta ya fala iimaliwa mbika koombaanga dhokiilando yokomunkulofuta.Malumbano naye woo ngoka ta tamanekwa mwaashika , okwa li tango ta ti kena mo sha moshinima shoka.Okwa tile aniwa Simson Matias okwe mu manga komaako noku dhingila osellotape kokana nokomayulu omanga aniwa inee mu undulamo,mosheenditho sho G4S ye aniwa ta fadhuka po nasho niimaliwa yasho. Kashihakumwa okwa londodha mboka ye na iimaliwa mbyoka ya hupako opo ye yi shunithe.Omukuluntu gwehangano lyo G4S, Dries Kannemeyer okwa koleke kutya natango ehangano lye ota li gandja oodola 500 000 kungoka ena uuyelele mboka tawu monikitha iimaliwa mbika noshowo oku kwatitha Simson Matias.Sigo oompaka kapena ngoka a ulike kutya oku na uuyelele washa moshinima shika.Kannemeyer okwa ti aagameni yomaliko mbaka oya tulwa manga pevi omanga ta pa ningwa omakonakono gomeni kombinga yoshinima shika.Sho apulwa ngele oshiningwanima shika otashi vulika sha teya po einekelo pokati kaaniilonga newiliko lyehangano, Kannemeyer okwa ti ndika olya kola natango, oshoka oshinima shika osha ningwa koohandimwe mboka ye na omadhiladhilogokulonga omiyonena.