Aadhanitanga ya Namibia moCOSAFA omwedhi nguka

OMUDHEULI gwospana yetanga lyokoompadhi ya Namibia, omusamane Tom Saintfiet okwa hogolola ongundu yaadhani 25.

Mbaka otaya ka kalelapo oshilongo muudhano wetanga lyokoompadhi lyedhina COSAFA SENIOR Challenge mo Zimbabwe omwedhi nguka.Okwa ti ospana ota yi ka shonopekwa opo yi kale ashike naadhani ye li 20 omanga inaa yi ya koHarare mo 22 ga Kotoba nuumvo.Ospana oya thikama po unene maadhani mboka ha ya dhanene oospana dhomeni lyoshilongo.Aadhani ayehe mboka ya ithanwa kiilonga yopashigwana otaya kala montanda yawo yokwiilongekidha oku za 18 ga Kotoba, moka ta ya kala nokwiidheula uule womasiku gahamano.Ospana yaNamibia ota yi tsakanene nospana ya Zambia muudhano wayo wotango mo 25 ga Kotoba. Namibia ota tameke muudhano mbuka pedhingoloko etitatu molwaashoka oku li pehala lili hwepo pamusholondondo gwa Fifa(ehala lya Namibia ngashingeyi eti 101 muuyuni), ndele Saintfiet okwa ti Zambia oye a tegelelwa a sindane.’Oye na aadhani ye na ontseyo oyindji,oyendji yomuyo ohaya dhana mo champion league, onkene otaya kala ye na uuwanawa owindji.Ndele tse ota tu yi muudhano mbuka nelalakano oku ya dhenga opo tu tsikile tu ye pondondo ya landulako.Ina ndi hala okwiipopila mpaka, ndele otuna okukala twa tseya kutya aakondjithi yetu oye na oonkondo dhi thike peni, ondi inekela kutya otwa hogolola ospana onankondo ndjoka ta yi ka dhana ngaashi sha tegelelwa.Ospana ya Namibia oya dhanene sigo opo quarter finala omumvo gwa zi ko moka ya li ya dhengwa mo ku South Africa. Ospana ya South Africa oyo ya sindanene po uudhano mbuka sho ya dhenge mo Mozambique.Pethimbo ndika omudheuli okwa hala okudhana sigo ope dhingoloko lya hugunina.