A totopo omukalo gwokwiiyopaleka pwaana omeya nando okashona

OMWIILONGI mounivesiti omu South Africa okwe ya po nomukalo gwokwiiyopaleka itaapa longithwa omeya.

Ludwick Marishane okwa etapo oshinima shika konima sho kuume ke ngoka ena onyalo yokwiiyoga emu kumike opo a dhiladhile po sha. Marishane okwa ningi omapekaapeko uule woomwedhi dhontumba mo internet, nokweetapo omukalo omupe gwo kwiiyoga pwaana elongitho lyomeya. Osheetwapo she shika oshe mu yalulitha muuyuni ongo omweetipo gwiinima iipe muuyuni.Marishane [22] omwiilongi po Univesiti ya Cape Town okweetapo oshilongomwa shedhina Dry Bath. Oshilongomwa shika osho oljeli ndjoka omuntu ho gwayeke koshipa, naandjika oha yi longo ngaashoi ashike omeya nothewa. Osheetwapo nenge oshihambulwa shika osha pethitha Marishane epapa lyuuyuni lyiithanwa Global Student Entrepreneur of the Year Award yomumvo 2011. Oshilongomwa shika ohashi longithwa moAfrica nopalwe miilongo opo ta yi putuka moka uuyogoki wopetameko wa nkundipala molwaashoka aantu oyendji kayena omeya ge li popepi.Oshilongomwa shika osha yooloka kwaashoka hashi dhipaga ombakiteli unene mbyoka ha yi iyogithwa kiikaha yo mbika oyina oalcoholi.Oljeli ndjika yo DryBath oha yi siikile oshipa nokushitutika.Marishane okwe ya po nedhiladhilo ndyoka ongo omunona omushona momukunda gwawo, konima sho kuume ke a nyenyeta kombinga yokwiiyoga pethimbo lyokufu unene tuu sho pwaana omeya omapyu.Nguka okwa li ena onyalo nokwa pula kutya omolwashike kaapena gumwe ngoka ta etapo oshinima shoka omuntu to gwayeke kolutu lwoye ndele eto kala inoo pumbwa okwiiyoga. Oshinima shika osho shemukumike opo a etepo oshilongomwa shika. Opo esheetepo okwa longitha ongodhi ye ndjoka yina ointernet oku konga uuyelele momapandja ga Google na Wikipedia okumona nkene ta tula kumwe iinima mbyoka ya ka shitapo shoka a ithana DryBath. Konima yoku shininga okwa pewa woo ombapila okuulika kutya Dry Bath osho osheetwapo shoka oye esheetapo tango tango.Oshilongomwa shika ngashingeyi oha shi longwa paipindi noha shi landwa komahangano omanene ngaashi ngoka gomatuko goondhila muuyuni, epangelo oku shipa aakwiita uuna yeli melundu.Marishane ota ti shika ota shi kwathele woo oku hupitha omeya.