A pewa oomvula omulongo nahetatu mondholongo

OMUKALIMO gwomoKeetmanshoop, Johannes Gawab (46) ota shi vulika a kale mondholongo oomvula 18 ngele eindilo lye opo epangulo ndika li talululwe olya ekelwahi.

Gawab okwa monika ondjo yedhipago sho a dhipaga omuholike gwe Anna Fransina Dreyer.Gawab okwa yaha Dreyer lutatu mepunda megumbo li li molukanda lwa Tseiblaagte moKeetmanshoop momu 19 gaNovomba 2005. Petameko lye pulakeno lye mompangu Gawab okwa ti ke na ondjo moshinima shika, no kwa ti okwa li ti ipopile sho aniwa a ponokelwa kaakwanezimo ya Dreyer.Sho a pe Gawab oomvula 18 mondholongo molwedhipago mompangu yoshitopolwa ya mengistarata moKeetmanshoop, mengistarata Godwin Chizhanda okwa ti edhipago olyo eyono ewinayi no kapena iitya oku li tothamo.’Oha li kutha po omwenyo gwomuntu, no ha li kutha omuntu uuthemba wopakotampango woku kala nomwenyo.’ Chizhanda okwa gwedha ko ta ti oompangu onkene oyi na okugamena uuthemba mbuka wopakotampango.Okwa ti omiyonena nelongitho lyoonkondo momagumbo olya vuka moshitopolwa shoka no mu yilwe woo onkene etumwalaka lyuukilila oli na oku tumwa kwaayehe ta li pitile moku gandja omageelo omadhigu opo mboka ya hala okulonga iilonga yomiyonena ya tya ngaaka ya tile oku shi ninga.’Shoka sha yela osho shika kutya nakutamanekwa okwa ponokele omukiintu kee na nando oshilwitho sha, sha nokwemudhipaga. Omuntu oto hongololwa u wu tye okwe mu dhipaga a fa e mu tula kohake.’Chizhanda a ti.Sho a ulike keipopilo lya Gawab kutya eyaho ndyoka olya li lyopamupya, Chizhanda okwa ti ka pwa li nando ompito yoshiponga pethimbo ndyoka Gawab a yaha Dreyer, no manga nokuli oshiningwanima shika inaashi ningwa.Chizhanda okwa pangulile Gawab molwa okuumba ondjembo mehala lyoshigwana uule womvula mondholongo, ethimbo ndyoka li na oku kwatelwa kumwe ne geelo lye lyoomvula 18 molwedhipago.Mosheetwapo she omutamaneki, Pieter Smit okwa pula Gawab a pewe egeelo lyoomvula omilongombali mondholongo Okwa ti Ompango yi na sha niikolokosha yomomagumbo oya etwa po, opo yi gamene aakiintu, onkene etumwalaka oli na okugandjwa kutya iikolokosha ta yi ningilwa oomeme ita yi idhidhimikilwa.Kombinga ye omupopiliko gwa Gawab,Gerrit van den Heever okwa indile opo a pewe egeelo lya kuthwapo nenge a pewe egeelo lyoomvula ka dhi vule pomulongo, tati edhipago ndika ota li etitha oluhodhi.Konima sho egeelo lya gandjwa,Van den Heever okwa ningi eindilo opo Gawab iifutilemo manga ta indile ompangu yi talule egeelo ndyoka.