A edhililwa mondholongo oomvula ndatu

O
MUKALIMO gwa Venduka okwa tumwa kondholongo oomvula ndatu sho a zimine kutya okwa dhipaga omweendi koompadhi moshilando omumvo gwa ziko, sho emu pumu nosheenditho shoka a li ta hingi omanga kwa li a kolwa.

Paulus Neliwa (29) okwa li ta hingi mepandaanda lyOmbakata mOkuryangava me 27 July 2008 sho a pumu, Amon Hendrick ngoka a li ta kambadhala okutaaguluka ondjila.Hendrick (58) okwa ehama komutse nokwa hulithile mpoka a puminwa kosheenditho.Neliwa okwa li a fudhile mokafudhilo koku yalula uuwindji wo alcohol nokwa monika kutya okwa li ena oalcohol oyindji yoomiligrama 0,59 momufudho, omanga ndjoka ya pitikwa oyo ashike oomiligrama 0,37 momufudho kehe.Neliwa okwa kwatwa konima yoshiponga shika sha kanitha omwenyo gwomuntu gumwe.Okwa li a mangululwa sho iifutile mo noodola 2 000 mu Aguste omumvo gwa yi.Neliwa okwa shuna ishewe mondholongo konima sho mengestrata Bernhard Tjatjara emu pe egeelo lyoomvula ndatu mondholongo.Neliwa okwa pewa egeelo konima sho a zimine kutya okunondjo meso lya Hendrick nonando ye oshinima shika ineshi ningila owina.Okwa ti okwa dhipaga Hendrick sho emu pumu nosheenditho she, molwaashoka a hingi nuuhasha.Okwa lombwele mengestrata kutya ina mona Hendrick molwaashoka ka li a tala nawa mondjila ye moka a li ta hingi osheenditho she.’Ondjila oya li yuukilila.Onda hingi nuuhasha’ Neliwa ta zimine.Eihumbato lya Neliwa olya li lyuuhasheelela, Mengestrata ta ulike.Omutamaneki gwepangelo, Salome Bampton okwa lombwele mengestrata kutya sho Neliwa a fudhilemo mokashina, okashina oka ulike kutya ye okwa li kohi yomalovu pethimbo a pumu omusi.Neliwa okwa lombwele ompangu kutya ye ina hokana ndele oye he yomunona gumwe, gwomvula yimwe noomwedhi ndatu.Nonando ke na iilonga oye awike ha kwathele mokusiloshimpwiyu omunona nguka.Mengestrata okwa lombwele Neliwa kutya epogolo ndyoka a zimine enene molwaashoka olya kutha omuntu omwenyo, osho omupanguli a ulike omanga inaa gandja egeelo ku Neliwa.Okwa ti nonando Neliwa okwa yono lwotango, etompelo kutya okwa li a kolwa, na okwa ndopa okukala a tala kondjila ye manga ta hingi osheenditho nongeyi okwa pumu Hendrick, osho ta shi mu geelitha nondholongo.’Edhipago lyaa shi lyowina otali indjipala apehe’Mengestrata osho a lombwele Neliwa.’Etumwalaka ta li zi moompangu ota li ti mboka taya hingi ya kolwa no ta ya eta iiponga ta yi fala meso oya tegelela okugeelwa unene’.Mengestrata Tjatjara okwa ti woo’ Ompangu ndjika ita yi sile ohenda mboka ta ya kutha yakwawo omwenyo, ta shi pitile mokuhinga nuuhasha.’Okwa pe Neliwa egeelo lyoomvula ne mondholongo kundhoka kwa kuthwa yimwe opo a kale inaa uvikila eyono lyafa ndyoka uule woomvula natano.