A dengwa, ta xwikwa eshi a vaka omboloto nombuta

… ounona ve li 69 okwa li va ningilwa omahepeko pokati kaJanualia 2023 naMarsa 2024

Eshi Weckson Amunyela (8) kwa li ehe shiivike apa a ya konima eshi ofikola ya dimbuka, xe woshilema Timoteus Amunyela (44) okwa kala e na oumbada neenghono.

Eshi etango la ningina komukunda Okalale koshitopolwahoololo shaMusati Etitano lomafiku 03 Mei, Weckson kakwa li natango e ya keumbo, xe okwa li a limbililwa nokwa li te lipula kutya pamwe omona okwa fya nande omeva momufima u li popepi navo.

Amutenya okwa kala nokukonga omona oufiku aushe. Lwopo12h00 efiku la landula, Amunyela okwa mona kutya omonamati kakwa li a kana, ashike okwa li a idililwa meumbo lovashiinda.

Amunyela eshi kwa li a popya noThe Namibian Etivali loshivike sha djako, okwa ti Weckson okwa li a dengwa shi nyanyalifa nodalate yolusheno nokwa li a xwikwa nomeva apyu kombuda.

“Onde mu pula kutya okwa ninga ngahelipi, okwa ti okwa li va hangwa meumbo lopuushiinda voo nounona vakwao voumati. Omushiinda okwe mu denga nee ndee te mu xwike nomeva apyu.” Amunyela osho a ti ngaho.

Komufala wopolifi koshitopolwa shaMusat, Ismael Basson, okwa ti nakuninga oshinima eshi shi nyanyalifa oye Amoni Iindongo (20), oo kwa li a holoka komhngau yamagestrata kOkahao. Oku li modolongo noshibofa shaye osha undulilwa komesho komafiku 09 Juni.
Weckson oku li monghalo i li xwepo moshipangelo shaKahao.

Oshibofa shaye oshimwe shomoibofa ihapu yomahepeko ounona oyo opo ya ningwa paife.

Omupopiliko wopolifi yaNamibia Kauna Shikwambi, okwa ti ounona ve li 69 okwa li va ningilwa omahepeko a nyanyalifa, okwa li va ningwa nai nokwa li inava filwa oshisho okudja muJanuali wodula ya dja ko fiyo omuMarsa wodula ei oshilongo ashishe. Okwa ti oshinima eshi otashi limbililike neenghono.

‘OTWA UDIFWA NAI’
Mwene womukunda Okalale Johannes Shipalanga okwa lombwela oThe Namibian oshivike sha dja ko kutya ovanamukunda ova udifwa nai koshiningwanima eshi.
“Kashi li mondjila.”

Shipalanga okwa ti ovanamukunda ove lixula okupewa oikulya yoshikukuta muMarsa.

Kamusela woshikandjohoololo shaTsandi Junias Amunkete okwa ti yee, pamwe neefikola, ovalelei veengeleka novanambelewa vopolifi moshikandjohoololo ova tameka okupopya novakwashiwana moshitopolwa opo ve va lombwele ve li kaleke kokule nokulikufila oveta.

Omukulunhuwiliki mombelewa yomuprima minista I-Ben Nashandi okwa ti omumbwe yoikulya nai lopotwe keembelewa dookamusela moikandjohoololo opo ku ningwe eenghendabala da pumbiwa shaashi oikulya yoshikukuta ohai yandjwa koitopolwahoololo keshe efiku.

OIBOFA IMWE

Omwedi wa dja ko, omupopiliko wopolifi moshitopolwa shaShana komufa Thomas Aiyambo okwa ti okaana kokamati (9) okwa li ka kwatwa keenghono, taka ningilwa omahepeko opalutu ndee taka xwikwa moshipala kuina ou e ka dala omunamido (37).

MuMarsa, natangao opolifi yaMusati okwa li ya lopota oshibofa shokaana kokamati keedula (5) oko kwa li ka xwikwa komukainhu weedula (35) eshi ka vaka oshuuka komukunda Omaku. Okaana okwa li ka mona oshiponga nai keenyala, keemhadi nokomaulu, oshikondo shokuninga omakonakono oimbuluma shopolifi yaMusati osho sha ti ngaho.

OSHINYANYALIFA
Shikwambi okwa lombwela oThe Namibian Etine loshivike sha dja ko kutya kapu na okaana ka pumbwa okuningilwa nande omahepeko oludi lasha nopolifi otai popi noministili youkakwashikekookanhu nomahangano akwao okuungaunga noinima i li ngaha opo va dule okuninga po sha ngaashi okuyandja omaxungomwenyo, okuninga oyoongalele nokupopya novanhu ovotava feekelwa tava ningi ile va ningilwa oinima i li ngaho oshipala noshipala.

“Mupya munene, moiningwanima ihapu oyo ya holekwa, opolifi oyo hai shi udu xuuninwa nopefimbo opo oshiponga osha holoka nale. Paemhito dihapu, oonakuningwa oihakanwa ohava kala ashike vamwena shaashi ove na oumbada wokulwifwa ile va ningilwe vali omahepeko amwe“Ohatu popi ovandali noonakufila ounona oshisho tava dopa okuyandja osho ounona va pumbwa keshe efimbo nokuvatonatela nawa,” Shikwambi osho a ti ngaho.

Opu na oinima ihapu oyo hai eta omahepeko atya ngaha ngaashi okuhe na oilonga, oupyakadi wopamadilaadilo, omatopauko meefamili nokulongifa omalodu noingangamwifi epuko, Shikwambi osho a ti ngaho.

“Omahepeko nokuhafila ounona oshisho nakumone exulilo, shaashi ounona ava otava dulu okukaninga ovakolokoshi ngee va kulu,” Shikwambi osho a ti ngaho.