642,279 onkee ya gumwa konkalo yomeya

OMUKULUNTU gwOmbelewa ndjoka ya kala tayi unganeke omauyelele gonkalo yomeya gefundja moNooli, ano omusamane Erastus Negonga, ngoka wo e li Amushanga ta Kalelele mUuministeli wOmapangelo gOpaitopolwa, Omagumbo nEhumithokomeho lyIitopolwa yokOmikunda, moshigongi shokugandja omauyelele kiikundaneki mOshakati mEtitatu lyoshiwike sha zi ko, okwa ti kutya aantu ye li 642,279 moNooli yopokati onkee ya gumwa natango konkalo yomeya gefundja omanga aantu ye li 81,829 ye li mompumbwe onene yiikulya.

Ombelewa ndjika yomusamane Negonga, otayi pata manga meti 30 Apilili 2009, molwashoka omeya oga tameka okupwinina notapu kala ashike iilonga yokuunganeka mboka ya monithwa iihuna komeya gefundja, ya kuthilwe pomahala gawo noya pumbwa okupewa iikulya niiyakulitho yilwe yesiku kehe, oshilongnenge oshinakugwanithwa shoka ngashiingeyi sha tulwa komapepe gIikondo yokweendelela po oonkalo dhopaulumompumbwe yomOombelewa dhOogavena mIitopolwa yi ili noyi ili.
Negonga ta lombwele iikundaneki kutya nonando omeya ga tameka okupwinina, opu na natango omahala gamwe mpoka aakwashigwana itaya vulu natango okutaaguluka molwashoka omeya mpoka omale natango. Ta ti ondjila odhindji okuya komikunda nokoondoolopa moNooli, odhi shi okweendwa niihauto, ashike opu na oondjila odhindji ngashi ndhoka dhoongalama dha mbonyagulwa po komeya na itadhi vulu okweendwa natango.
Negonga ta ti aantu oyendji mboka ya monithwa iihuna komeya gefundja, onkee ye li mompumbwe onene yiikulya, unene tuu monikunda mIitopolwa yomuushayi moka. Nande ongawo, tate Negonga ota ti kutya, Ombelewa ye oya monene po iikulya notayi tsikile oku byi topolela mboka nye li mompumbwe onene yiikulya.
Negonga ta ti kutya sigo oompaka opu na aantu ye 13295 ya kuthwa momagumbo gawo omanga ye li 2402 ya kala ya tulululwa moshitopolwa shomoNooli yopokati.Negonga ta ti opu na natango oondjila dhongalama dhi li 14 ndhoka itadhi vulu okweendwa nuundoolopa wu li 5 mboka ominino dhawo dhohanya kumwe nomatale wago wohanya ga yonagulwa po komeya gefundja. Ngashiingeyi, Negonga ta ti opu na ashike Osikola yimwe ndjoka itayi longo, oonkwawo adhihe dha patele ngashiingeyi odha patuluka naanona otaya yi kootundi dhawo nombili. Osikola ndjoka natango ya pata, Negonga ota ti, Oseko yoPombanda ya Nesi mUukolonkadhi mOshitopolwa sha Musati.
Aanasikola mboka ya gumwa konkalo yomeya gefundja natango onkee ngaa ye li 96825. Iipangelo ya li ya pata ngashiingeyi oya patuluka nopu na ashike Okaklinika kamwe komOshitopolwa sha Shana hoka inaka patuluka natango. Ngashiingeyi omahala ashike ge li 40 haga talelwa po pamayakulo gopaunamiti, okuyelekanitha nomahala 49 iiwike ioyali ya kapita. Muule wiiwike itatu lwaampoka inamu lopotwa nande omukithi gwOkolera mOshana, mOmusati, mOhangwena nomOshikoto, ashike Omalaria mIitopolwa mbyoka ine oge li taga pula komeho. Omusamane Negonga ta ti kutya pethimbo ndika okwa lopotwa nale aantu ye li 21,354 okuyelekanitha naantu ya li 20,699 iiwike iyali ya pita po.
Mboka ya kolekwa pamakonaakono gopaLabora oye li 4548 okuyelekanitha naantu ye li 4383 oshiwike shiya sha zile ko. Mboka ya dhipagwa komalaria ngashiingeyi oye li 36 okuyelekanitha naantu ye li 34 mboka ya lopotelwe ya sa iiwike iyali ya pita po.Aantu ye vulithe pethele limwe oya lopotwa ya sa omeya omanga yaali natango kaye wetike hela ya gwilile momeya moka oomwedhi dha zi ko.
Aalimimpaya ye li 3631 oya kanitha iilya yawo nokuyonenwa iigandhi yawo komeya gefundja omanga ye li 20,319 omapya gawo ga yonagulwa po thiluthilu komeya gefundja momikunda moka, omanga nee ye li 81,829 kaye na sha shokulya noya pumbwa iikulya meendelelo ngashi tashi vulika.
Negonga ta ti kutya sigo oompaka oongombe dhi li 1422 odha sa omolu onkalo yomeya gefundja moNooli. Oondoongi odhi li 455, iikombo oyi li 7939 noonzi dhi li 89. Negonga ta tsikile ko ta ti kutya aantu mboka ye li natango moothaila mOshitopolwa sha Shana oye li 1787 okuyelekanitha nomwaalyu gwaantu ye li 2188 ya li mo iiwike iyali ya pita po.
mOhangwena omu na ye li 593 okuyelekanitha nomwaalu gwaantu kwa li gu li pu 1272 mOshikoto onkee shi na omwaalu gwantu 35 ngashi nngaa oshiwike sha zi ko omanga mOmusati mu na ye li 2402 okuyelekanitha naantu 3658 oshiwiek sha zile ko. Negonga ta yelitha kutya ta ti kutya sigo oompaka oya mona po omagano okuzilila kaasihenda ge thike pongushu yOodola dha N$566,328.24.
Kombainga nee yomashongo ga taalelwa moshinima shonkalo ya etwa po komeya gefundja, Negonga ota ti kutya ngele tashi ya pokusa omeya, ayehe taya ungaunga nonkalo yomeya gefundja oye na okwiitula mo nokutala kutya oshinima shesomeya osha kalwa moshipala nenge osha ungaungiwa nasho lela noonkondo.
Ta ti Uuministeli wUuhaku ou na okuungaunga noshbinima shOmalaria, omanga Uuministeli wElongo wu na okuungaunga noosikola, wo Uuministeli tau ungaunga neopalekululo netungululo lyOondjila, noshowo wi itule kumw enaamboka wOmapangelo gOpaitopolwa nomagumbo nEhumitho komeho lyOkomikunda, ya ungaunge neopaleko lyominino dhohanya kumwe noondama dhohanya.
Shi na sha neopaleko netulomo lyuundjugo, oshinima shi na okukala tashi ungaungiwa nasho kUuministeli wUuhaku, wUunamapya, UNICEF noshowo Omalelo gIitopolwa noondoolopa. Egandjo lyiikulya koshigwana sha mona iihuna noshi li mondjala, oshinakugwaithwa shOmbelewa yOmuprima gwoshilongo.
Kombinga yOsikola dhIikunino, oshinima shUuministeli wUukashikekookangu, omanga ehunngomwenyo li na okuningwa kOongeleka nosho tuu kUuministeli wUunamapya, wOmavi nOmatulululo. Uunamapya moshinima shika owa ukilila unene maanafaalama ya hepekwa komeya gefundja noye li ya pumbwa ehungomwenyoNegonga ta tseyitha kutya onkalo yondoolopa yOshakati otayi ka talulululwa meendelelo ngashi tashi vulika, noku na nale nokuli oshigongi ngula meti 29 Apilili 2009 moka tamu ka tseyithwa shoka sha thanekelwa Oshakati, kutya okuza mpaka otapu ka ningwa naanaa shike, nOshakati otayi ka tulwa naanaa methano li li ngiini.