3 ya kwatwa po shi na sha nedhipago pOmaruru

AALUMENTU yatatu oya kwatwa po shi na sha nedhipago lyaakulupe yaali Jannie (80) na Toets (75) Kruger pofaalama yawo yedhina Parry pOmaruru momasiku 12 ga Maalitsa 2009.

Omukuluntu gwOpolisi moshitopolwa sha Erongo, Komufala Festus Shilongo, okwa lombwele The Namibian kutya aafekelwa mbaka oye shi zimina kutya oye na mo sha medhipago laakulupe mbaka komeho ga Mengestrata pOmaruru mOlyomakaya.
Okwa li nee kwa tegelelwa ya holoke mOmpangu ohela, ya lopotelwa edhipago, eyugo, uufuthi nokukala niinima ya yakwa. Shilongo okwa ti gumwe gwomuyo okwa li nale a mokakuma pOmaruru, a li e na oshipotha sheyako lyiimuna.
Omufekelwa omutiyali okwa li a kwatelwa moshitopola sha Matjete mOlyomakaya na ombisitoli ndjoka ya li ya yakwa megumbo lyaakulupe mbaka, oya li aniwa ya adhike mohauto ye.
Omufekelwa omunene okwa li a kwatelwa pegumbo limwe molukanda lwedhina Ozondje mOmaruru mEtitano na okwa li aniwa a adhika nombisitoli ndjoka ya li ya longithwa mokudhipaga aakulupe mbaka. Omukulupe gwomukulukadhi okwa li a yahwa montulo limwe manga a li ta kondjo nomudhipgi gwe megumbo lyawo, sho omusamane gwe a li a yahwa moshipala mange e li mombete.
‘Omufekelwa omunene okwa kala aluhe e li mokashoko, ta kambadhala oku tu holama. Okwa li wo mOvenduka nomOkahandja, ihe sho galukile kOmaruru otwe tumi ko osipana yi ke mu kwate po, h Shilongo ta popi ngaaka.
Shilongo, ngoka omathimbo ga zi ko a li pewa ombanda yUukomufala, okwa pandula oshigwana sho sha kwathele Opolisi opo aafekela mbaka ya kwatwe po.
‘Elongelokumwe lyatya ngeyi pokati kOpolisi noshigwana, ookiliminola oonene kadhi mpoka tadhi ka holama, h ta tsikile ko ngaaka.