3 ya holoka mOmpangu monkambadhala yeyugo

OMULUMENTU omutiheyali taku fekelwa kutya okwa li mongenga yaayugi mboka ya li yu dhengwa nooholo kOpolisi sho ya li ya kambadhala okuyuga Obaa yimwe mOvenuka mEyine lya zi ko, okwa li a adhika a holama mObaa ndjoka, konima yoowili ntano sho Opolisi ya yaha okusa yaali yomaayugi mbaka.

Yaali oya li ya ehamekwa.
Omufekelwa nguka omutiheyali okwa li a adhika a holoma konima yelapi lyopekende, Inspekta omukuluntu Robert Sanjahi, osho a popi ngaaka.
Aalumentu mbaka oya li ya ningi onkambadhala ya ponya yokuyuga Obaa yedhina Pool Bar (ya tseyikwa nawa nedhina Amarula) ku mboka haya kala mo.
Lwopokati mpoka, Opolisi oya li ya pititha omadhina gaalumentu yaali mboka yahwa okusa kOpolisi. Aalumentu mbaka oyo nee Tuhafeni Kakololo (gwoomvula 39) na David Ndume (25).
Gumwe gwomaalumentu mboka ya li ya ehamekelwa monkambadhala yeyugo ndika, oku li okiliminola onene.
Omulumentu nguka ( e na eho limwe) okwa li aniwa kuume kokiliminola onene, nakusa Tomas Nandjebo (a li a tseyika nawa nedhina Bob Green), ngoka a li yahwa kOpolisi mOnooli momasiku 5 ga Novemba 2003.
Yatatu yomaalumentu mbaka, Lisias Amwaama (35), Nande Valombola (28) na Titus Shooya (34), oya li ya holoka mOmpangu ya Mangestrata mOvenduka mOmaandha goshiwike shika.
Ayehe oya tindilwa ombooloha na oshipotha shawo sohuundulilwa komasiku 23 June 2009, opo natango ku ningwe omakonakono.