AANTU ye li 12 oya kwatwa po omasiku ga zi mo mOnooli sho ya yonagula omukanka gwomeya gwopokati ka Shakati na Ruacana.
Pamushangwa, NamWater okwa ti kutya oshinima shaantu taya yono omukanka nguka, otagu piyaganeke oonkambadhala dhOkampani okumana okwoopaleka omukanka konima sho gwa li gwa teywa komeya gefundja omumvo gwa zi ko.
Omugandjimulombo gwa NamWater Johanness Shigwedha, okwa ti aantu mbaka oya li ya mangululwa sho ya futu Oondola/N$500 kehe gumwe. NamWater okwa ti eyonagulo lyomukunka nguka otali ka pula aniwa Okampani ndjika oshimaliwa shOondola/N$400 000.
‘Osha monika mo kutya aakwashigwana yamwe oya kala nokuyonagula omukanka, unene tuu pokati kOutapi nOshakati, moonkambadhala dhawo dhokukwata oohi nenge taya kutha mo omeya gu uka komapya gawo,’ Shigwedha osho apopi ngaaka.
NamWater okwa ningi eindilo kaakwashigwana ya kuthe mo ooneta dhawo momukanka, molwashoka otadhi shunitha pevi etondoko lyomeya momukanka.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
