Ndishishi a ti sha koondohotola dhopaumwene

OONDOHOTOLA yopaumwene ohaya tula ashike aavu yawo miipangelo yepangelo shampa ya mono kutya itaya vulu we oku ya kwathela nongele ya mana oondjenda dhawo oombedhi ohadhi pewa ashike epangelo.

Ndhino odha tumbulwa kuhamushanga guuministeli wuuhaku nonkalonawa Andrew Ndishishi poshiithanene niikundaneki mEtiyali tuu lyoshiwike shika konima yoshigongiilonga sha li ko. Okwa ti omathimbo gamwe epangelo ohali yelwa ashike oombedhi dhuuhasha noomwenyo dhaavu yontumba tadhi kana moshilongo omanga ombedhi ya li yi na okukala yu ukithwa koondohotola yopaumwene.
Inaa gandja naanaa uuyelele womuule, Ndishishi okwa ti omukulukadhi ngu a tandelwe kondohotola ye yopaumwene okwa mana oondjenda dhe moshipangelo shepangelo shaShakati oshiwike sha zi ko noshigwana osha gandja ashike ombedhi kepangelo.
“Iipangelo yetu ohayi taamba ko aavu ayehe ongele oyopaumwene nenge mboka haya yakulwa kepangelo. Onkene osha simana koshigwana niikundaneki ya mone kutya omuvu oku li momake galye omanga inaaya tameka okugandja ombedhi kepangelo,” Ndishishi a tsu omuthindo mpoka. Ndishishi okwa tsikile ta yelitha kutya oondohotola yopaumwene ohaya thithwa kiipangelo yepangelo ya tandele mo aavu yawo nongele inashe enda nee nawa oshigwana niikundaneki ohaya gandja ashike uusama kepangelo. Amushanga guuministeli wuuhaku nonkalonawa Ndishishi okwa yelitha wo kutya uuministeli wawo otawu kambadhala ngaashi tawu vulu oku kandula po omukundu gwoondohotola dhopaunamiti inaadhi gwana moshilongo ashihe. Ngashingeyi anuwa oyi ipyakidhila nokudheula oondohotola yopaunamiti noyendji otaya ka dheulwa komeho.
 Ndishishi okwa gwedha po wo kutya aanambelewa yuuhaku otaya kambadhala ngaashi taya vulu okuhupitha oomwenyo nonando nee pamwe opu na ngaa uuhasha poompito dhimwe. “Inandi itaala ngele opu na ngaa omuntu e na ashike elalakano lyokudhipaga aantu. Aanambelewa yuuhaku mbono ya monika ondjo muuhasha nomomakanitho goomwenyo inaaga yela otaya tamanekwa nokupewa omageelo.
Aanambelewa yuuhaku ye li yatano oya kuthilwe manga miilonga pakathimbo muApilili omumvo tuu nguka konima yeso lyokahanona koshikondo shokupulumuthila moshipangelo shepangelo shaShakati. Adelheid Jacob ngono oye yina yokahanona hono taku popiwa ka mana oondjenda dhako okwa gandja ombedhi yuuhethi nenge yuuhasha kaapangi konima sho ya ndopa oku mu kwathela a mone nawa pamukalo. Omakonakono ga ningilwe palombwelo okuza kuuministeli owa mono kutya shika osha ningwa molwoonkondo dholusheno dhaa ha li naanaa nawa nomolwomwaalu gwaapangi inaagu gwana nawa.
Yane yomaapangi mboka ya kuthilwe miilonga pakathimbo sigo onena inaya shunwa mo miilonga noye li natango anuwa ya tegelela ko ngaa omanga gumwe ngwiya omutitano a shunwa mo nale miilonga nokuli. Omwedhi ashike gwa zi ko Helve Markus okwa valele okahanona ke hoka ka ka mana wo oondjenda dhako oowili mbali ashike sho opo ka valwa moshipangelo shepangelo shaMariental.
 Naye wo okwa gandja ombedhi kaapangi mboka ya li miilonga pethimbo shoka tashi ningwa a ti oya kala ashike ya fa yaa he mu wete nokwe etha nee a mone ashike ngaaka pwaa na nando ekwathelo lyasha. Ashike okakomitiye ke na sha niikumungu ya fa mpono moshipangelo shoka oka mono kutya ka pu na naanaa uuhasha washa peso lyokahanona hoka kaHelve Markus.
 Oshiigongiilonga shoka sha popiwa petamekolela osha li sha ningwa mOmaandaha nEtiyali lyoshiwike shika okuhumitha komeho omalongekidho guuministeli wuuhaku womumvo 2013 sigo omumvo 2017 nokutholoma po oonkatu dhokondandalunde lela dhomalongekidhi ngoka.
Oshiigongiilonga osho tuu shika osha tala wo kiilonga yomathimbo ga piti muuministeli owo tuu mboka oku shi talela momalalakano ga tulilwe po omumvo 2009 sigo omumvo 2013.

---