Aanafaalama yaMangetti osho ya ningi oshigongi

AANANGESHEFA yaMangetti mewiliko lyomunashipundi gwehangano lyaanangeshefa yaMangetti tate Ismael Shailemo mEtiyali lyoshiwike shika oya ningile oshigongi moka ya kundathana iinima ya pamba aanafaalama ya Mangetti.

Mokati kiinima ya kundathanwa kuyo ongaashi: omaindilo gaanafaalama ye ga ningile nale kepangelo shi na sha nuuyene woofaalama. Aanafaalama mbaka taya popi wo kombinga yuulumbu, ano woshikukuta sha taalela oshilongo kumwe nuunafaalma washo, unene tuu kombinga yawo yaMangetti. Aanafaalama mbaka taya tula po wo ethanekwasiku moka mu na oku ka ningwa oshigongi oshinene shaanafaalama yaMangetti moka wo mu na oku ka hogololwa ewilikongundu epe lyehangano lyaanafaalama ye li kohi yewiliko lyomusamane Ismael Shailemo. Oshigongi osha ningile wo omapulo kutya, ano opu na yamwe ya hala okutota po ehangano lyawo lyaanafaalama?
Kombinga yomaindilo ga ningilwe kaanafaalama ge na sha nuuyene wevi, ano woofaalama, omusamane Shailemo okwa tseyithila oshigongi kutya ehangano olya kala nokukondja pu ningwe oshigongi nuuministeli womavi nomatulululo, ashike iitongi ayihe ya pulilwe inayi ka ningwa molwashoka elelo lyOndonga, ndyoka oshitopolwa shoofaalama dhaMangetti shi li kohi yalyo, kalya li ilongekidha, ano kalya li lya mana nomalongekidho galyo moshinima shika.
Shailemo ta ti, okwa li kwa thanekwa oshigongi shatya ngeyi shi ningwe ngeno kwali meti 12 Januali nuumvo, ashike inashi ka ningwa oshoka elelo lyOndonga inali adhika natango lya mana nomailongekidho galyo moshinima shika. Taku thanekwa shimwe shi ningwe ngeno meti 9 Febuluali 2013, nasho inashi ningwa oshoka elelo inali mana kwali okwi ilongekidhila oshigongi shoka. Oshititatu nasho inashi ka ningwa oshoka opwa li pwa holoka uupyakadhi weso lyominista yelongo omundohotola Abraham Iiyambo. Okwa thanekwa nee ngeno shi ka kale ko mOlyomakaya ga ngula, ashike nasho osha kalekwa molwashoka aniwa elelo lyOndonga oli na po iinima yimwe ya pamba oshigongi shika, li na oku yi kundathana manga.
Oshigongi nee shaanafaalama mbaka, shoka sha li ko mEtiyali lyoshiwike shika, ano meti 15 Mai 2013, osha uvathana shi tegelele ko ngaa natango, ashike oshu uvite kutya elelo lyOndonga ngeno nali endelele ngaa okutula iinima yalyo pehala, unene tuu nee pokati kalyo nuuministeli womavi, uuna tashi ya komaindilo gaanafaalama guuyene wevi. Ku ningwe oshigongi nziya opo ya mone kutya oya thinda peni noofaalama dhawo. Ashike oyi indila kelelo lyOndonga li endelele okutula iinima yalyo pomahala moshinima shika, oshoka oya vulwa okutegelela ngaa nee.
Kombinga yoshikukuta, aanafaalama oya hala oku uva kutya ekwatho lyepangelo kombinga yelandithopo lyiimuna otali ende naanaa ngiini na openi tali monika miitopolwa niitopolwa nenge miikandjohogololo niikandjohogololo. Oshigongi tashi indile nee kelelo lyasho, li ka mone ombelewa yomuprima Hage Geingob meendelelo ngashi tashi vulika.
Oshigongi osha kundathana wo oshinima shewilikongundu lyehangano lyawo ndika lyaanafaalama yaMangetti, nosha tokola ku ka ningwe oshigongi oshinene shaanafaalama yaMangetti mboka ye li mewiliko lyomusamane Ismael Shailemo meti 1 Juni 2013.
Ehala notundi opo tayi ka tseyithwa komeho. Oshigongi tashi ningi wo omapulo kutya osha fa shi uvite pu na ehangano limwe lyaanafaalama, nosha yelithilwa kutya pokuma otapu popiwa shili aanafaalama yamwe ya tota po ehangano lyawo lyaanafaalama, tali ithanwa aniwa kutya ehangano lyaanafaalama yaMankete, ndyoka yamwe ye li tala ko kutya olya thikama ashike maanafaalama yaaNdonga, noshihako shalyo osha yooloka kwaashoka shehangano lyaanafaalama yaMangetti mewiliko lyomunashipundi gwalyo Ismael Shailemo.
Oshigongi shika shaanafaalama yehangano lyaanafaalama yaMangetti shoka sha ningilwa metala lyombelewa yoshilongo shaNdonga mEtiyali lya zi ko, osha li sha kalwa kaanafaalama yoyeneyene yaMangetti ye vulithe pomilongontano. Osha li she egululwa negalikano nokupatwa wo negalikano komusita Julius Mtuleni.

---