I igaluluka moshipotha a li a tulila moThe Namibian

Omunangeshefa gwomOvenduka ngu a li ta tamaneke nokupula a futwe N$500 000 koshifo shoThe Namibian osho i igaluluka nokwa kutha mo oshipotha shoka sheshunduluukwatya ohela. Omupanguli Kato van Niekerk okwa adhika ta tsikile nokuuva nawa kuumbangi moshipotha shika sheshundulo lyomunangeshefa Petrus Gabriel pamwe nehangano lyedhina Okalindi Group CC koshifo shoThe Namibian ohela mompangu yopombanda mOvenduka.

Oshipotha inashi ka tsikila we konima sho omupanguli  a tseyithilwa kutya Gabriel nehangano lyOkalindi Group CC oya tokola yaa tsikile we noshipotha shoka ya li ya tulile oshifo shoThe Namibian.
Anuwa oya tokola yaa tsikile naashoka noya popi wo kutya otaa ka futa ashihe shono oshifo sha adhika tashi ka futa. Tse otwa taamba ko ekuthomo lyoshipotha sha li sha ningilwa oshifo shoThe Namibian, osho omulongekiidhishangwa gwoshifo a komenda ohela.
Gabriel nOkalindi Group CC oya li taa tamaneke oFree Press of Namibia ndyono li li ehangano yene lyoThe Namibian, omulongekiidhishangwa omukulu gwoshifo Gwen Lister nomulopoti gwoonkundana Denver kisting mekwatathano nokArtikela ka nyanyangidhilwe moThe Namibian momasiku 20 Mai 2010. Mokartikela moka ka li ka shangwa kuKisting omwa li mwa lopotwa kutya opolisi yaNamibia oya kwata ko oombiila,omakende goombiila ga pwa nosho tuu pehala lyayimwe dhoomongeshefa dhOkalindi mOvenduka konima sho ya konakona oshipotha sheyako mehangano lyoNamibia Breweries.
Omupopilikuluntu gwopolisi omupehakomishina Hophni Hamufungu okwa popi ongonzo yuuyelele, omanga omupopiliko omukwa wo gwopolisi a lopota kutya konima okwa ka monika kutya oombiila nayilwe oya kuthwa kehala lyongeshefa yilwe, ihe hapongeshefa yOkalindi.

---