A pewa omimvo odhindji mondholongo molwedhipago

Oompangu dhaNamibia itadhi ka etela nande gumwe ohenda shi na sha niipotha ya pamba omahepekathano gomomagumbo nomageelo otaga tsikile nokuninga omadhigu noonkondo. Ndino olya li elondodho okuziilila komupanguli Christie Liebenberg mompangu yopombanda mOshakati sho a li a gandja egeelo lyoomvula 25 kuhe yuunona utatu molwedhipago metine lyoshiwike sha piti. Phillipus Nhinda okwa zimine kutya oku na ondjo moshipotha shedhipago oshiwike manga inuu uva egeelo lye.

Nhinda okwa zimine kutya uusiku weti15 lyaJanuali sigo 16 2012 okwa dhipaga omukulukadhi gwe Julia Ipudilo Ishinda poHainengena omukunda gu li moshitopolwa shEenhana sho e mu dhenge noshiti molutu aluhe.
Ishinda naNhinda oyo aavali yokanona kokakadhona komimvo ne, ompangu oya lombwelwa wo kutya  Nhinda oku na wo uunona uushona wu li uyali. Nhinda ngono a li e na oomvula 35 pethimbo a li a dhipaga okwa lombwele ompangu kutya ye naIshinda oya li ya ka talela po uukamba pooha dhaandjawo kongulohi manga inaa ka dhipaga. Okwa galukile kegumbo kee li nomukulukadhi gwe ngono kaa li e mu wete pethimbo ndyoka. Sho omukulukadhi a galukile wo kegumbo Nhinda okwa ti omukulukadhi okwa li tu ulike a kolwa nokwa tameke oku mu ula nayi. Nhinda okwa penduka etayi pondje yondunda nolugodhi olwa tameke.
Nhinda okwa ti kutya pompito yimwe Ishinda okwa kala nokugwa nolundji okwe mu homatekulula sho a kutha ko okati hono Ishinda a kala nokulongitha. Nhinda okwa kala nokumudhenga iikando oyindji nokati. Ishinda okwa penduka nokwa ka lala naNhinda okwe ke mu adha ashike a sa ongula yesiku lya landula. Nhinda okwa popi kutya ye anuwa elalakano lye ka lya li okudhipaga omukulukadhi ashike okwa kala nokushimona sho a kala noku mu dhenga sho a lala pevi.
Omupanguli okwa lombwele Nhinda kutya oshigwana osha tegelela aantu ya kale momakwatathano  gopaukuume lela noshi na okukambadhalwa na inaa kala haa etha omaiuvo gawo ge ya wilike unene noku ya hingila komamonithathano giiponga. Omupanguli okwa tumbula wo kutya okutala nee ondondo yiipotha yoludhi nduno monena, omimvo omilongo 25 ota li kala egeelo lye mu opalela. Nhinda okwa li omuniilonga thimbolimwe ngaa komukulufuta manga a li inaa ninga ngaaka nokwa kala mo nale nokuli oomwedhi omulongo nandatu mondholongo manga inaa pangulwa.

---