Ehilathano kombinga yokongressa ya Nafau

AMUSHANGA gwehangano lyaaniilonga yiikulya nayalwe nenge Namibia Food and Allied Workers Union[Nafau] okwa ti oshigongi oshinene shehangano ndyoka otashi ka ningwa ngaashi sha thanekwa lwopetameko lya Kotoba nuumvo.

Kiros Sackarias okwa ti  oshigongi shoka otashi yi komeho okuza momasiku 4 sigo 7 Kotoba nuumvo, tashi ka ningilwa pEenhana moshitopolwa Ohangwena.
Sackarias okwa ti oshigongi otashi ka ningwa nonando opwa li okangundu okashona hoka kali ka ningi oshigongi shaali pampango sholutu olupitithi lwopashigwana lwa Nafau. Oshigongi shoka taku tiwa kashali paveta osha li sha tokola kutya okongressa ya Nafau na yi ka ningwe mOkahandja okuza 11 sigo 14 Kotoba.
Sackarias okwa endulula kutya omasiku noshowo ehala mpoka tapa ka ningilwa oshigongi oshinene sha Nafau oge li ngaashi ga tseyithilwe. Kombinga yoshigongi shoka sha ningilwe ehuliloshiwike lyayi, Sackarias okwa ti shoka kasha li shina eyambidhidho lye, na okwa indile iilyo ya Nafau opo yi pangule  oshigongi shoka sha ningwa shaali paveta no yaa taambe nenge ya zimine  omatokolo ngoka gaali pampango.
Nando mongundumpitithi omuna iilyo omilongo 22, otaku hokololwa kutya oshigongi shomehulilo shiwike osha li ashike sha kalwa kiilyo konyala yili 10 nosha tokolele kutya okongressa na yi ningilwe pOkahandja okuza 11 sigo 14 ga Kotoba nuumvo. Iitayi yimwe ya Nafau oya indile opo omuperesidende noshowo omudhiginini gwiiniwe, Abel Kazondunge na Florence Rukkata mboka ya lundilwa kutya ota ya longo ya fa ya langela ehangano na ya kuthwemo manga miilonga yo ya pingenwepo kaapevi yawo.
Mbaka ota ya lundilwa kutya oya tindi okufuta iifuta yoku yambidhidha iitayi ya Nafau, noshowo ya ningi oonkambadhala oku kateka eningo lyoshigongi oshinene shaNafau.Oshiwike shayi aanambelewa ya Nafau moshilongo ashihe oya li ya indile opo Kazondunge na Rukkata ya pingenwepo kaapevi yawo, na ishewe kutya okongressa yaNafau yi ka ningilwe pEenhana ngaashi sha thanekwa. Omautho gekotampango lya Nafau otaga utha kutya okongressa oyina okuningwa konima yomimvo ntano kehe.
Okngressa ya hugunina ya Nafau oya ningilwe omumvo 2006. Iitayi mbyoka tayi pula okongressa oyiitaala kutya pethimbo lyayo ota pa ka hogololwa ewiliko epe  ndyoka yiitaala ishewe kutya ota li ka wilika nawa ehangano lyawo.Sackarias okwa ti Nafau ota ende nondjila ya puka na okwa pumbwa elunduluko mewiliko lye.Oshiwike shayi okwa li a ulike omaipulo kombinga yoonkambadhala dhaanambelewa yopevi mehangano mboka ya li ya longekidha oshigongi shongundupitithi shaali pautho.

---