The Dogg omutumwa gwa MVA moondjila

MARTIN The Dogg Morocky okwa ulikwa omasiku ngaka ongo omutumwa nomukalelipo gwoshiketha MVA, shina sha negameno lyomoondjila. Oshinakugwanithwa she oshinene osho okulonga aagundjuka omaihumbato geli nawa uuna ta ya longitha oondjila.

Uuyelele mbuka owa kolekwa komupopiliko gwa MVAF, Catherine Shipushu, ngoka ati esimaneko ndika olya pewa Morocky konima sho a sindanapo epapa lyomwiimbi gokwaito methigathano lyaa hiki ngalo ya Namibia. Oshiketha shika osho, sha gandjele iimaliwa mbyoka ya pewa ngoka a sindana po epapa ndyoka.MVA okwa li a kwashilipaleke okwaito molwaashoka omusika ndjika oya simana  noyi holike kaagundjuka. Shipushu okwa ti Morocky oku na enwethemo enene,mokati kaapulakeni yomusika ye, onkene MVA okwa hala oku longitha enwethemo ndyoka oku longa aagundjuka egameno moondjila noshowo oku longitha nawa oondjila.
Shipushu okwa ti omiyalu dhaantu mboka ya sile miiponga odha ulike kutya oyendji yomuyo oyo aagundjuka yopokati komimvo 16 no 35. Shipushi okwa ti, The Dogg ota kala omukalelipo nomutumwa gwa MVA kombinga yelongitho nawa lyoondjila uule womvula yimwe. Shipushu okwa li a pulwa kombinga yehokololo kutya Morocky okwa li a monika ondjo  moku kala nosheenditho shina okadiska kolisensa kaakeshi koshili, ndele ye okwa ti, MVA ita lumbula  The Dogg ompito ndjika, ngele okwa monikile ondjo , na pewe ompito opo iilonge okuza komapuko ngoka a ningi opo a longe aagundjuka.Morocky ota ka pewa iimaliwa uuna ta longele MVA moku taandeleka etumwalaka lyegameno lyomoondjila.
Morocky okwa ti kewete pena eipumomumwe meuliko lye ongo omutumwa gwa MVA, nehokololo ndyoka lya popi kutya okwa kwatelwe nokadiska keli kosheenditho she, kali, kaashi koshili. Okwa ti ye okuuvite uuntsa sho eli omutumwa, a gwedha ko a ti oshipotha shoka osha pwa nosha hulapo, na ishewe ye okwiilonga oshilongwa kombinga yasho.Iiwike iyali ya piti, okwa li kwa hokololwa kutya Morocky aniwa okwa futile oshimaliwa oku zimine ondjo ye kutya osheenditho shoka a landele komuntu paumwene osha li shi na okadiska komashangitho gasho kaake shi koshili.

---