Omulumentu gwoomvula 30 a dhipaga yina niitago

By: OSWALD SHIVUTE

OMULUMENTU gwoomvula 30 gwomomukunda Omangundu popepi nOnankali mOndonga moshitopolwa sha Shikoto, okwa kwatwa po kopolisi ta fekelwa kutya okwa dhipaga yina, Paulina Ndawedapo gwoomvula 62 gwomomukunda tuu ngoka gwa tumbulwa metetekelo, sha ningwa komatango gosoondaha ya zi ko.

Ngoka e li pehala lya Komanda gwOpolisi moshitopolwa sha Shana, Chief Inspecta Karl Theron ota ti omulumentu nguka gwoomvula 30, komatango gosoondaha ya zi ko, okwe ya megumbo lyawo moka ta nyenyeta, aniwa ita yakulwa nawa kaantu yaandjawo. Ta kutha oshiti, ta tameke okudhenga yina nayi nayi, olutu aluhe. Te mu teya okooko noku mu dhenga wo nayi nayi komutse noshiti shoka nokusa. Mboka ya li po nayo okwa tameke te ya tidha noshiti shoka. Ta dhenge okamatyona kamwe kokatekulu ke noshiti shoka noku ka ehameka, ndele taka falwa koshipangelo sha Nandjokwe.
Omulumentu ngoka, taku tiwa kutya okwa fa ta ehama momutse, ano omukambelindunge sho a zi mpoka, aniwa okwa matuka a thinda kopolisi ya Katope ta igidha kutya oku na uudhigu. Aapolisi sho ye mu mono nokupulakena uudhigu we, oye mu fala meendelelo koklinika ya Katope nokuza mpoka okwa falwa koshipangelo sha Nandjokwe.
Apehe mpaka opolisi naayehe ya kala taye mu yakula kaya li ye shi kutya omulumentu nguka kegumbo lyawo okwa ninga ko oshikulumuna shi thike mpoka. Konima mboka yokegumbo ndyoka oye ya kopolisi nokulopota oshiningwanima shika.
Opolisi sho ye shi uvu, oya matukile kOnandjokwe nokukakwata ko omulumentu nguka noku mu patululila oshipotha shedhipago. Sho ya mono kutya nani okwa fa kee li nawa momutse oye mu fala koshipangelo sha Shakati koshitopolwa shaanuuvu kaye li nawa momitse, hoka e li ta mono epango megameno lyopolisi.
Chief Inspecta Theron, ngoka a li pamwe na Chief Inspecta Moses Kashala na Chief Inspecta Kamati, okwa ti kutya edhina lyomulumentu nguka itali vulu manga okutseyithwa manga ina holoka mOmpangu.
Ta ti opolisi otayi konaakona oshiningwanima shika.

---