Epangelo lya lundulula omulandu gwaanona yamita

OSHIKONDO shElongo otashi lundulula omulandu gwasho kombinga yaalongwa mboka ya ninga omategelelo opo gu kwatelemo woo okugeela nayi mboka haya gandja omategelelo ngoka. Ominista yOpevi yElongo, David Namwandi ina vula oku tomona shuukilila kutya omageelo ngoka ogo genipo, ndele okwa ti etalululo lyaanguka ota li ka manithwa omumvo nguka.

Oshinima shoka shiinyengitha Namwandi osha landula omahokololo ga ti konyala aanona yaakadhona omayovi 6 000 pokati komimvo 10-19 oya ningi aasimba moshitopolwa sha Kavango okuza omumvo 2010 sigo onuumvo.
Namwandi okwa ti oshikondo she osha tokola okutalulula omulandu nguka molwaashoka aanona mboka ya simbapala olundji mboka yeshi ningi oomboka ha yeya sile oshimpwiyu, aalongisikola, ooyinakulu, noshowo aawiliki moshigwana. Namwandi okwa londodha kutya oonkatu otadhi tulwa miilonga opo kehe ngoka taka mitika omunona gosikola a geelwe noonkondo. Omiyalu okuza koshikondo shoka odha ulike kutya oshitopolwa sha Kavango ota ku tiwa osho shimwe shina omwaalu gwaanasikola ya mita guli pombanda okuza omumvo 2008. Oshitopolwa oshitiyali momwaalu gwaamiti moosikola ooshoka sha Hangwena sha landulwa kwaashoka shOmusati.Konyala aanona yeli omathele 352  moKavango aasimba oya ndhindhilikwa omumvo 2008.
Omwaalu nguka ogwiindjila sigo opaanona 382 mo 2009 nomo 2010 ogwa thikama paanona 390.
Ekwatelokumwe kombinga yesimbapalo lyaanona yosikola mOkavango olya ti moshikako shotango shomumvo 2011 olya ulike kutya aanona 119 oya thigipo osikola omolwa omategelelo pokati ka January na April omumvo ngoka. Oshifo sha New Era osha li sha hokolola kutya aakadhona yomwaambaka 119 , yatatu oye  li  mondondo ontine omulongo nayaali omondondo  ontintano nayatano omongundu ontihamano.
Omuwiliki gwopahedhi yaaShambyu, Mutero Sikerete okwa indile epangelo nayalwe opo ya katuke oonkatu okushonopeka omategelelo mokati kaanona yaanasikola.
Emito mokati kaanasikola moshitopolwa sha Hangwena olya li aanona yosikola 294 mo 2008, 286 mo 2009 no 231mo 2010.Momusati, mboka ya li yena omapunda oya li yeli 165 mo 2008, 254 mo 2009 no 234 mo 2010. Oshitopolwa shina aanona yosikola ye na uusimba oya li ashike omwaalu omushona mOmaheke.
Omiyalu dhepangelo odha ulike kutya aanasikola 1400 oya thigipo omanongelo, nomwaalu nguka ogwa londo sigo opaantu 1700 mo 2009.

---