Yatatu yi ipatana edhipago lyomuhingi gwotaxi

GUMWE gwaalumentu yatatu taya tamanekelwa edhipago lyomuhingi gwotekisa pokapale ka Hage Geingob Stadium oomwedhi ne dha yi, oya ti ti kutya gumwe gwomuyo oye ena sha noshinima shika.

“Inandi longa omuyonena ngoka, Isaskar Nau-Gawaseb (gwomimvo 38)”, osho a lombwele Mengestrata Vanessa Stanley  mOmaandaha, pethimbo ya li  ya taya ipopile komatamaneko gatatu ngoka ya ningilwa.

Aalumentu mbaka, Nau-Gawaseb, Jackie Jakcson, oya ti kaye na ondjo momatameko agehe gatatu.

Oya ti omufekelwa pamwe nayo Kaveto Pontianus Kwandu oye a dhipaga omuhingi gwotaxi.Nau-Gawaseb, Jackson na Kwandu otaya tamanekelwa edhipago lyomuhingi taxi, Alfons Rijatua (42) sha ningwa uusiku weti 18 noshowo 19 April nuumvo. 

 Rijatjua okwa li a yahwa nondjembo montulo.Kwandu ota ku tiwa okwa li ta longele pokapale kuudhano hoka ongo omugameni pethimbo shika sha ningwa. Otaku tiwa Jackson na Nau-Gawaseb oya li ya talelepo  ehala ndyoka pethimbo edhipago lya ningwa.

Rijatua okwa li a fala mbaka kehala hoka motaxi ye.Konima aniwa sho Rijatua adhipagwa mbaka yatatu oye mu yugu  ohauto ye yoToyota, ocellphone, oradio yomohauto, nokashina kokudhana oongalo dhUuCD. Otaku fekelwa kutya konima sho yadhipaga Rijatua mbaka oya kuthapo olutu lwe  noku lu fala  komukunda gwa Rockey Crest noku lu umbila miihwa. 

Oshihauto she oye ke shi thiga ko Golgotha moKatutura. Kwandu ,Jackson na Nau-Gawaseb ota ya tamanekelwa edhipago, eyugo ewinayi noshowo okuya ompango moshipala  nenge onkambadhala yokuya ompango moshipala.

Etamaneko etitatu olya zi mefekelo kutya oya kutha po olutu lwomusi noku kelweekelahi, oya kutha ko woo oonomola dhohauto noya siikile ombinzi ndjoka ya li ya ziyila mosheenditho shoka omanga osheenditho inaa ye shi thiga po.

Ota ya tamanekelwa ishewe  oku shanga iifundja membo lyiiningwanima pokapale  sho ya ti ina pa umbwa sha na ishewe Jackson na Nau-Gawaseb kaya lipo pehala mpoka esiku ndyoka nokutya Kwandu ina thigapo ehala lyiilonga ye.

Nau-Gawaseb ngoka oye awike  gwomaafekelwa a popi sha mompangu  okwa lombwele Mengestrata Stanley kutya ye na Jackson oya talelepo okapale  mpoka pwali ta pa  longo Kwandu uusiku mboka. Kwandu aniwa okwe ya egululile omweelo ye na Jackson oya piti no ya yi pombanda pokapale. Sho ye na Jackson ya galuka okuza mpoka ya li oya adha  Kwandu  aniwa adhipaga nakusa Rijatua. 

Nau-Gawaseb okwa ti keshiwo kutya omolwashike adhipagele Kwandu,  ta gwedha ko ta ti nguka napopye kutya okwe shiningile shike.Kwandu okwa kala a mwena itaa ti sha Omaandaha.

Konima yomapopyo gaambaka oshipotha shawo osha undulilwa ko 28 ga Kotoba opo Omutamaneki-Ndjayi a ninge etokolo kutya oshike shina okuningwa po mwaashika. 

Aafekelwa mbaka yatatu oye li mondholongo sigo onena. Jackson okwa li  akwatwa mo 19 ga April, Kwandu okwa kwatelwe mo 21 ga April omanga Nau-Gawaseb meti 27 lya April nuumvo. 

---