Shoombe ota ti okwa kengelelwa papolotika momahogololo gaahogololwa

By: OSWALD SHIVUTE

OMUNAPOLOTIKA a tseyika nawa mOutapi mOmusati, Shoombe Isack Shikwambi (Omukumo nOmatokolo gaAfrika), ota nyenyeta kutya okwa longelwa okwaana uuyuki, sha ningwa pethimbo lyoshigongi shokudhinda nokuhogolola aahogololwa yaali mboka taya ka thikama momahogololo gopaitopolwa niilando ga taalelwa mu Novemba nuumvo.

Shoombe ota hokolola kutya moshigongi shedhindo lyaahogololwa yoSwapo sha ningilwe mOutapi meti 2 Septemba 2010, sha li shi na okukalwa kaahogololi ye li 54 nosha li ashike sha kalwa kaahogololi ye li 28, oshe mu hogolola ye pamwe nayakwawo yaali, yo yamwe yaali taya ndopa molwashoka ayehe kumwe oya li yatano. Osha li nee shi li ngeyi kutya sho omahogololo ngoka ga ningwa gumwe okwa yambuka mo nomake omulongo na Shoombe namukwawo gumwe taya zi mo nomake ge thike pamwe, kehe gumwe a zi mo nomake omugoyi (9). Taya shuna mo, na manga ngeno ye li ngaa pokuhogolola, gumwe gwomaanashigongi, pazimino lyomuwiliki gwomahogololo okwa zi mo moshigongi, aniwa a ye kOmbaanga, ye ina hogolola. Omahogololo oga shuna mo naahogololi ye li ashike 27. Omuhogololwa ngoka a zile mo namake ge thike pamwe na Shoombe tango, ta zi mo nomake 14 ye Shoombe ta zi mo nomake 13. Ombugayele oya tameke moshigongi moka, tayi ti kutya Shoombe okwa nyokomwa shaashi eke lye olya ya naangoka a thigi po omahogololo nokuya kOmbaanga pazimino lyomuwiliki. Oshinima sha ningilwa owina. Shoombe ta ti uupyakadhi wa li po owo mboka kutya ngoka a ya kombaanga okwa tuminwa oSMS e ye aniwa a hogolole pomawi ngoka ge li koshipelende. Shoombe ta gandja eipulo lye moshinima shoka kutya omuntu a tya ngawo a popiwa naye mongodhi nenge a tuminwa oSMS, otashi vulika a lombwelwa ngoka e na okuhogolola, ano onomola ndjoka e na okuhogolola, shaa li pahalo lye. Okwa li kwa toka lela noonkondo, Shoombe ta ti, niilyo oyindji oya li nale ya hala yi ka konge oolefa yi shune komagumbo. Gumwe gwomaahogololi, mokuuva nayi, okwa zi mo ndee ta yi, ye na Shoombe pakuuva nayi, naye okwa zi mo molwashoka kapu na we uuyuki noshili mpoka. Shoombe ota ti kutya omahogololo ngoka kaga li pauyuki, opwa li pu na ando ondunge ya longekidhwa po owina Shoombe a kane. Shoombe ta ti, ye osho ta dhilaadhila, ta ti nomuntu wu uvite ko osho wo ngaa to dhilaadhila.mEsiku lya landula lyeti 3 Septemba 2010, Shoombe ota ti kutya, okwa fala enyenyeto lye ndika kOmbelewa yomuunganeki gwOswapo moshikandjohogololo shAutapi, ngoka a li wo omunashipundi gwoshigongi  shomahogololo. 

---