RP na RDP ya shaina euvathano lyokuyamumwe

OONGUNDU mbali dhompilameno odha shaina euvathano opo dhi ye mumwe. Euvathano ndika olya shainwa pokati kongundu yo Republican Party naandjoka yo Rally for Democracy and Progress[RDP] moVenduka.

Eshaino ndika olyo etameko lyeyomumwe lyoongundu ndhika mbali. Meyomumwe ndika ina pa ulikwa kutya onkalo yomutse gwa RP , Henk Mudge ota yi ningwa ngiini.Ndele omupevi peresidende gwa RDP, Steve Bezuidenhoudt okwa ti uukumwe mbuka  otawu  ende nokweeta aawiliki yo RP momahala ngoka taga holoka po mewiliko lyo RDP, unene tuu mokomitee ompitithi noshowo mongundumutima. Ongundu yo RP oya kala momwenyo omimvo 30 sho ya totelwepo ku Dirk Mudge  he ya Henk , ndjika oya tegelelwa yi ka kanepo. Mudge okwa ti ngele osha pumbiwa okwi ilongekidha okugandjapo oshipundi she moparliamende opo eyomumwe ndika li longe.Oongundu ndhika otadhi kala nombelewa yimwe moparliamende nokwiikwathela melongitho lyoshimaliwa.Bezuidenhout okwa ti eyomumwe ota li wilikwa kongundu yewiliko yuukumwe. Uuna shika sha manithwa nena omaliko agehe ga RP noshowo oongunga dhe otadhi ningi notaga ningi ga RDP. Shika ngele osha pu nena RP ota ka tseyithila  Okommissi yomahogololo ya Namibia kutya ongundu ota yi ka halakanithwa po.

Moomwedhi ndatu tadhi landula oongundu ndhika otadhi ka ninga iikonga yomahogololo gomalelo giilando noshowo giitopolwa pamwe, pahapu dhomuperesidende gwa RDP , Hidipo Hamutenya.Mudge okwa ti oonkundathana kombinga yelongelokumwe pokati koongundu ndhika ,mbali odha tamekele omimvo ndatu dha piti.Okwa ti ehokano ndyoka lyopapolitika ota li eta ehulilo lyelelo lyoSwapo. Okwa igidha neinekelo kutya eshaino lyeuvathano lyelongelokumwe olyo etameko lyehulilo lyewiliko lyoSwapo okuwilika Namibia. Okwa ti ota lombwele AaNamibia ayehe mboka ya mono iihuna kohi yepangelo lyo Swapo kutya ongundu tayi pangele ota yi dhengwa.Mpoka pwa shaininwa euvathano ndika oompoka woo, Hamutenya a ningile etseyitho kutya ye ota zimo mo Swapo konyala oomvula ndatu dha pitipo, nokonima yoomwedhi ndatu okwa totopo ongundu ye yo RDP.Mudge okwa ti okuna omukumo kutya Hamutenya oye omuntu noRDP oyo ongundu yomondjila okulongela kumwe opo ya dhenge Swapo nokuhwepopeka onkalamwenyo yaantu ya Namibia.

Mudge okwa ti etiyali osha li etameko lyeyomumwe lyoongundu itaadhi pangele . Konima yoonkundathana odhindji, oongundu dhilwe odhina natango iilonga okuninga meilongekidho okujoina uukumwe mboka. Okwa ti omiyelo dhawo odha egulukila mbaka uuna ya pyakudhukwa okuya joina.Pahapu dha Hamutenya uukumwe no RP osho eshina lyopolitika okuhinga Namibia muukumwe wopapolitika, oshoka omahupilo otaga nkundipala nuulingilingi owa taandela tashi pitile meiyambapaleko.

Okwa ti iilyo yo Swapo oyo iihakanwa yuukayamukulwa , na aniwa Swapo ina ninga sha kombinga opo omulandu gwedhiminathanepo lyopashigwana gu longe.Okwa ti aakwashigwan 400 000 ota ya mwenya moluhepo no ka yena iikulya yagwana. Okwa ti oongundu ndhika mbali odha hala okweendulula omishangwa dhomilandu dhepangelo ndhoka natango inaa dhi tulwa miilonga  opo ndhika yedhi tule miilonga . Okwa ti opena omilandu moombelewa dhepangelo lyoSwapo inaadhi tulwa miilonga oshoka mbaka kayena ethimbo oku dhi tula miilonga. Ethimbo aniwa yena oondyoka lyokukondjithathana, oya kwatathana poothingo, nota ya hepeke oonkondo dhawo ngaaka.Okwa ti mboka yomoSwapo ota ya kondjo esiku kehe no sho ngeyi taya dhimbwa okutula miilonga omilandu.Hamutenya okwa indile aanafaalama ya longithe uunongo wawo opo ya longe iikulya oshoka yo oya pumbiwa moshilongo muka.

---