Nafinu ota yambidhidha Kaaronda

EHANGANO lyOokampani dhaaniilonga mOokampani dhi na sha niimaliwa mu Namibia/Namibia Financial Institutions Union (Nafinu) otali yambidhidha Amushanga-Ndjayi gwehangano lyomahaganpo gaaniilonga mu Namibia/ Namibia National Workers Union (NUNW), Evilastus Kaaronda, oya natango a pewe oshipundi shika.

Nafinu okwa indile wo Omuperesidende gwopakathimbo gwa NUNW, David Namalenga kaye mo momahogololo gOmuperesidende gwehangano ndika.

Amushanga gwa Nafinu Asnath Zamuee okwa ti Namalenga ngoka e li omuwiliki gwoonzo dhopantu mehangano lyokutunga oondjila nenge Road Contractor Company (RCC) ke shi omukalelipo gwaaniilonga ihe ye omugandji gwiilonga. 

Zamuee okwa ti “osho eitaalo lyetu kutya ye ita vulu oku kala omuperesidende gwe hangano lyaaniilonga.”

Okwa Nafinu ota ka popya nomuthindo koshinima shengambeko lyomahogololo, unene kombinga yOmuperesidende kutya olye e na ompito yokuthikama ong’omuhogololwa na olye ke na okupitikwa e shi ninge. 

Zamuee okwa ti aantu mboka ye li miilonga ongo aawiliki yoonzo dhopantu kayena, no ina ya pitikwa ya hogololwe mewiliko  lyomahangano gaaniilonga.

Okwa ti Omuperesidende gwehangano lyaaniilonga pakotampango lya Nafinu okuna oku kala oshilyo noshowo omuunganeki nomupopili gwaaniilonga miilonga.

Zamuee okwa ti ehangano lye olya tegelela pokongressa pukale oonkundathana dhina omwenyo, tadhi popi iiyetwapo ngaashi oshiketha shopenzela yaaniilonga yomepangelo )(GIPF), Kuleni, noshowo iiyemo yopetameko nenge Basic Income Grant.

Omupopyo gwe ogwa landula sho The Namibian a kundana kutya iiyetwa po mbika ita yi monika melandulathano lyiikundathanwa konima yoshigongi sha NUNW sha li sha kalwa komahangano agehe ge li kohi ya NUNW.

Nonando iiyetwapo mbika ina yi tulwa miikundathanwa aakalelipo oyena ompito oku yi tula melandulathano lyiikundathanwa pethimbo lyoshigongi. 

Zamuee okwa ti Nafinu okwa hala oshinima shuulingilingi , eiyambapaleko neipumomumwe lyomahalo, yi kundathanwe poshigongi. Okwa ti itashi uvikiwako kutya aawiliki  yaaniilonga oya hogololwa okukalelapo nokugamena uuwanawa woopenzela dhaaniilonga ndele oha ya iyambapaleke niimaliwa yiilyo yomahangano. 

Okwa ti oshinima sha Kuleni osha pumbwa okuhulithwa po pethimbo lyoshigongi na okwa indile omuperesidende, Hifikepunye Pohamba a ulike okakommissi kiithikamena opo ka konakone GIPF nawa. Kuleni ehangano lya dhikwa po kaawiliki yewilikongundu lya GIPF opo li longe peha lya GIPF.  

 “Otwa tegelela okongressa yi ka kundathane nokupatana oshinima shika na ota tu pula opo ewilikongundu lya GIPF, aawiliki yiikondo moGIPF nomukuluntupitithi  ya tulwe pevi nomaliko gawo ga kankamekwe itaaga longithwa sha omanga tapa ningwa ekonakono lyomuule,” Zamuee ta indile. 

Nafinu ehangano lyaaniilonga etine ta li yambidhidha Kaaronda, konima sho oshifo shesiku sha  New Era sha kundaneke etitatu kutya ehangano lyaaniilonga yomoomina ya Namibia (MUN), ehangano lyiilonga yiitenda nayilwe lya Namibia (Manwu) naandyoka lyaaniilonga yomalweendo (Natau) ya koleke  uukandidate waKaaronda. 

Omahangano ngaka gane oga tegelelwa ga kalelwepo kaakalelipo 260 ta ya zi maakalelipo 766 ya tegelelwa ya hogolole  poshigongi.

Ehangano lyAaniilonga yomEpangelo/Namibia Public Workers Union (NAPWU) ndyoka amushanga gwalyo, taku tiwa oye eli konima yoshikonga shokukondjitha Kaaronda ota li kala niilyo oyindji poshigongi.  Ihe mboka ta ya yambidhidha Kaaronda oye na etegameno, ota sindana oshoka aakalelipo yo Napwu haayehe taya ka hogolola omukandidate ngoka a ha lika kwaamushanga gwehangano.

---