GIPF ina pulakena omayele gaayaluli

EWILIKONGUNDU lyoshiketha shoopenzela dhaaniilonga yepangelo osha tsikile okugandja omikuli dhoomiliona 22 kehangano lyoompo lya Namibia OPN nonando aayaluli oya londodha kutya ehangano ndyoka olya li lya hutuka noli na oongunga dhoomiliona 75.

Uuyelele mbuka owa hololwa kehangano lyiithikamena lyaayaluli ndyoka lya li lya ningi omakonakono palombwelo lyehangano lyokutalela omahangano giimaliwa moshilongo[Namfisa].Iimaliwa mbika oya li ya ziminwa piigongi ihamano yewilikongundu lya GIPF pokati ka Juni 2004 na Juni 2005, iigongi iyali yomwaambika ka yi na omishangwa dhiiningwanima piigongi mbyoka, osho aakonakoni ya ulike.Oya ti kapena ishewe euvathano lyasha kombinga yomikuli ndhika, osho ehangano lya Sizwe NtsalubaVSP ehangano lyaayaluli yoko South Africa lya ti.

Aayaluli mbaka oya gandja ethaneko kutya pu ningwe ekonakono lyomuule lyehangano OPN unene pu talike ngele opwa li eipumomumwe lyopailonga lya guma Risto Kapenda omuperesidende nale gwa NUNW noshowo ZM [Maru] Tjihumino omuyaluli gwakwaalukehe muMinisteli Wiimaliwa pethimbo ndiyaka.Omushangwa gwa gandjwa ku GIPF oshiwike sha yi ogwa ulike kutya oomiliona 179 kumwe adhihe odha li dha pungulwa mu OPN nenge Karas Abattoir and Tannery Processors[KAT] ngaashi lya lukululwa pokati komumvo 1996 no 2009.Ndele sigo opehulilo lyomwedhi gwa yi iimaliwa ashike yoodola oomiliona 18, 6 odho dha shunithwa oku za ku OPN oku ya ku GIPF.Oshiketha shoopenzela dhaaniilonga yepangelo osha landitha po iipambuliko yasho  mo OPN kehangano lya Brukkaros Meat Processors momumvo 2007.Momushangwa hokololo gwawo kuNamfisa, Sizwe Ntsaluba okwa ti aayaluli ya Ernst na Young piigongi oyindji oya li ya londodha GIPF kutya  OPN okwa mbangolota pehulilo lya Juni 2004. Okwa li ishewe kwa ulikwa kutya pamukalo nguka GIPF ota wilike ehangano nuuhasha, osho omushangwa gwa Namfisa gwa ulike.

Iimaliwa ya GIPF oya kala ta yi gandjwa koOPN nonando ehangano ndika kalya li lya gandja omishangwa dhiimaliwa yalyo  okuza komumvo 1999 sigo 2003. Omanga omayalulo gomumvo 2004 oga koleke elondodho lya Ernst na Young kutya OPN ota soongunga. Elondodho kombinga yuunkundi pashimaliwa wa OPN owa li wa popiwa komunambelewa omukuluntu gwa GIPF , Primus Hango mu Juli 2003 a londodha kombinga yuudhigu wa taalela OPN.

Ye naye aniwa okwa li inaa pulakenwa newilikongundu olya zimine opo oomiliona ntano dhi pewe OPN ongo omukuli.Momvula oyo tuu ndjoka GIPF okwa zimine okugandja omukuli gwoomiliona 32 melongelokumwe nehangano lyonyama lyaanafaalama. Namfisa okwa tseyitha nokuulika kutya kombinga yomukuli ngoka, ZM Tjihumino okwa li a ulikwa omuwiliki gwa Karas Abattoir and Tannery, ndika olya li ehangano li na iipambuliko mOPN, ye nguka okwa li ongo omunashipundi pethimbo lyoshigongi shewilikongundu lya GIPF poshigongi sha li ko mo 29 ga Juli 2003 sha li sha kundathana etokolo okugandja omukuli  gwoomiliona32 ku OPN.

Omushangwa konakono ngoka gwa li gwa pumbiwa oku tala kutya aawiliki ya GIPF mboka ya li woo aawiliki ya OPN oha ya futwa ku OPN, nenge mbaka oya li ya longithwa nayi muuwanawa wa OPN.Ota ku tiwa kutya iigongi 20 ya GIPF mpoka pwa tokolwa omikuli dha OPN ndhoka dha tumbulwa momushangwa gwa Namfisa, omishangwa dhiigongi yili omugoyi yaambika ina dhi monika. Omanga omikuli 16 ndhoka dha gandjwa inapa monika omauvathano kombinga yadho.

Namfisa okwa ndhindhilike kutya omikuli dhimwe inadhi ningilwa omaindilo nenge kapena omishangwa ta dhi ulike sha kombinga yomaindilo.Onkene kape shiwike kutya ewilikongundu olya longitha oshiyelekitho shinipo opo li gandje omikuli ndhoka ku OPN osho omushangwa gwa Namfisa gwa ulike.

---