GIPF a puka nomukuli gwa Endjala

OSHIKETHA shoopenzela dhaaniilonga yomepangelo GIPF osha kanitha oodola oomiliona dhivule ndatu dhiihohela mbyoka ya li yina okufutwa, molwaashike ombapila ndjoka ya gwedhwa ko keuvathano lyomukuli gwehangano lyokumuna iingulu lya Namibia, [Namibia PigFarm] lya shainwa komuntu inaa pewa uuthemba eshi ninge.Ekanitho ndika olimwe lyomomapuko gamwe ga ningwa kuGIPF mokulonga nomukuli gwoodola oomiliona 26,4 dha pewa ofaalama yiingulu okuza moshiketha shomapendulepo. Oshiketha shika nankene sha gandja iimaliwa kaa indili yomikuli osha li sha konakonwa kehangano lyokutonatela omahangano giimaliwa moNamibia[Namfisa].

Ekanitho ndika ta li popiwa olya hololwa momushangwahokololo gwa Namfisa ngoka gwa ngongwapo konima yekonakono.Omushangwa ogwa ulike kutya NPF ina shunitha nando osenda yimwe yomukuli ngoka a pelwe okuza omumvo 2001. GIPF okwa li ashike ena okumbilipalelwa noodola oomiliona 9,8  nenge ooperesenda 37 dhiimaliwa mbyoka a tula mo NPF, konima sho ehangano ndika lya landwa po kehangano ha li ithanwa Number Two Piggeries[PTY] Ltd omumvo gwayi.

Omushangwa gwa ngongwa po kaayaluli mambo yiithikamena, Sizwe Ntsaluba, konima yekonakono lyoshiketha shokugandja omikuli dhomapendulepo [DCP] peha lya Namfisa, ogwa ulike kutya ewilikongundu lya GIPF olya zimine omukuli gwotango gwa NPF gwoodola oomiliona 18 mu Auguste 2001.Omishangwa dhoshigongi shoka sha ningi etokolo odha ulike kutya ewilikongundu olya ti pamayele gaawiliki yomapungulo ya Sanlam, ongeshefa ndjika oyi na ompito yokuponya pashimaliwa yondjele yopokati.Ndele omushangwa gwa Namfisa konima yekonakono ogwa mono kutya oomenendya dhomapungulo dha Sanlam hasho dha ti kombinga ya NPF, ndele dho odha gandja omayele kutya ompito yokuponya pashimaliwa kwehangano ndika oya li yi pombanda yondjele yopokati  sha hala okutya, oproyeka ndjika oya li ta yi vulu oku kanitha oshimaliwa shoka nuupu. Aayaluli oya ulike momushangwahokololo gwawo kutya omayooloko ngaka oga pumbwa oku kandulwapo . Ishewe aayaluli oya ulike kutya inaya mona uumbangi mboka tawu ulike kutya opwa ningwa ekonakono ku GIPF kombinga yompito yehangano ndyoka kutya oli na ethaneko lyopangeshefa ta li ka longa, omanga mbaka inaa ya zimina okugandja omukuli ngoka.Momushangwa ngoka gwa ngongwa po ko GIPF mu Maalitsa nuumvo, oshiketha shika osha ti NPF okwa li ta wilikwa ku John Endjala, ngoka a li ena ooperesenda 30 dhiipambuliko mehangano ndyoka. GIPF okwa ti  moshinima sha NPF, John Endjala oye a dhana onkandangala moonkundathana noshowo okulanditha  oprojeka ndjoka.

Namfisa okwa ti okwa mono ashike omishangwa dhiiniwe yomimvo 2003 no 2005, ndhoka adhihe dha ulike kutya NPF okwa li a hutuka paungomba, tashi ti keena oshimaliwa.Momumvo 2003 oongunga dhehangano ndika odha li dhi vule omaliko galyo sha pitilila noomiliona 3,3. Momumvo 2005 oongunga dhaNPF odha pitilile omaliko ge noodola omiliona 1,3 nehangano olya li lya kanitha oshimaliwa konima yokufuta otax shoodola oomiliona 2,5.Momushangwa gwomumvo 2005 aayaluli oya ti oshigwedhwapo komukuli gwa GIPF ngoka gwa pewa NPF osha li sha shainwa komuntu keena uuthemba okushininga,naashika osha ningitha ewilikongundu lya NPF ya mone kutya ita ya kala ya mangwa koshinima shoka.Oshigwedhelwa shika osha pitike opo ethimbo lyesilohenda lyokushunitha omukuli ngoka li fupipikwe okuza koomwedhi 36 okuya koomwedhi 18.Ngele oshigwedhelwa shika osha shaininwe komuntu eli mondjila ando NPF okwa futu iihohela komuli nguka yoodola dhi vule poomiliona 3.Onkene ando NPF okwa kala ena oongunga dha GIPF dhoodola oomiliona 30.Pauvathano lyomukuli ngoka gwa pewa NPF aaniipambuliko oya li ya zimine kutya ota ya gandja ekwashilipaleko lyokugamena omukuli gwa GIPF.Aakonakoni ya Namfisa ina ya vula okupewa omakwashilipaleko ngoka.

Okwa gandjwa ethaneko kutya GIPF oku na okutala ngele omakwashilipaleko gatya ngaaka opo ge li opo  a vule okugalulako iimaliwa mbyoka kaaniipambuliko. Omushangwa ogwa indile opo pa ningwe ekonakono lyomuule kombinga ya nkene iimaliwa yomikuli mbika ya longithwa noshowo omatompelo kutya omolwashike  ehangano ndika lya longo kohi yetompelo kutya ehangano olya hutuka.

---