Epangelo tali kondjitha oshipotha sha Goabab

OSHIPOTHA moka amushanga nale gwoshigongi shopashigwana Nama Goabab nomutamanekwa omukwawo Abraham George ta ya tamanekelwa uulingilingi ndele oya ethiwa kutya kayena ondjo mushika, otashi ka pulakenwa mOmpangu Onene yoshilongo.Omupanguli Marlene Tommasi okwa mangulula Goabab[53] na George[49] metamaneko lyuulingilingi, konima sho epangelo lya manitha okugandja omatompelo galyo.

Omupanguli Tommasi okwa pe epangelo ompito opo li ninge eindilo kOmpangu Onene yoshilongo opo ndjika yi talulule etokolo lye kombinga yuulingilingi.Goabab na George oya tegelelwa ya ka galukile kOmpangu yOpombanda momasiku 17 ga Maalitsa omumvo ta guya  oku uva kutya uunake iihokolola yawo ta yi ka tsikilwa.

Pethimbo olyo tuu ndyoka otapa longekidhwa opo pu tulwe esiku uuna ndoka eindilo lye pangelo ta li kondjitha etokolo lyomupanguli Tommasi li pulakenwe. Eindilo ndika ota li ka gandja ompito kOmpangu Onene yoshilongo opo yi ninge efatululo lyuulingilingi kutya olya li lini manga ompango yokuyanda iimbuluma inaa yi tameka nokonima ndjika sho ya tulwa miilonga.

Goabab okwa monika keena mbudhi momatamaneko gatatu guulingilingi omanga George a monika keena ondjo momatamaneko gaali guulingilingi.

Oya li taya tamanekelwa kutya oya longitha iiyenditho yepangelo pokati ka Maalitsa na April 2007. Iimaliwa yokufuta omolwa elongothi lyiiyenditho mbyoka oya li oodola 23 552,20. Oodola 18 497,20 oya futwa koshigongi shopashigwana.

Goabab na George oya ti kayena ondjo momalundilo ngaka. Goabab ota tamanekelwa ishewe epogolo lyokulongitha osheenditho shepangelo keena epitikilo okushininga. Unene tuu sho ye ha pewa iimaliwa yokulanda osheenditho she mwene.Natango mbaka yaali oya taalela etamaneko lyekengelelo nenge lyokuyaka, na Goabab oye awike okwa taalela etamaneko lyokulongitha osheenditho keena epitikilo lya mwene.Tommasi metokolo lye okwa ti omweeti gwoshipotha ina ulika pwaana omalimbililo kutya omatamaneko ngoka mbaka ta ya ningilwa ogo shili.Omweeti gwoshipotha Orben okwa indile opo omupanguli Tommasi emu pe ompito opo a ninge eindilo kOmpangu Onene yoshilongo a ti efatululo lyuulingilingi olya nenepekwa kompango yokukondjitha uulingilingi.

---