Oshipotha shomahogololo sha tumwa kOmpangu Onene

AATSEYIMPANGO yoongundu dhompilameno ndhoka dha kanitha oshipotha shadho , sha li tashi kondjitha omahogololo goshigongi shopashigwana nogopauperesidende ga Novomba 2009 oya gandja eindilo lyomeendelelo kOmpangu onene yoshilongo.

Meindilo ndika oongundu ndhika otadhi pula Ompangu ndjika yi ya pe ompito opo yi ya pulakene sho taya kondjitha etokolo lya gandjwa komupanguli peresidende, Petrus Damaseb ngoka a li  a ekelehi oshipotha shawo, molwaashoka osha shangithwa ethimbo lyatoka.
“Otwa gandja omishangwa adhihe dheindilo palandulathano kOmpangu onene metiyali,’ ahende gwoongundu ndhika, Tobie Louw gwehangano lyoohahende lya Theunissen Louw nooyakwawo a koleke sho a pulwa koThe Namibian.
Aapanguli, Damaseb na Collins Parker oya tende mo oshipotha shika  noya ti oongundu ndhika na dhi fute iifuta yoohahende dhaamboka ya li taya tamanekwa, oshoka eindilo, oshinima shika shi pulakenwe kompangu Yopombanda osha gandjwa sha tokelwa konyala notundi yimwe mu gane ga January 2010.
Omuwiliki gwo Republican Party, omusamane , Henk Mudge  okwa lombwele oThe Namibian tati eindilo opo shika shi pulakenwe kOmpangu onene olya kankamekelwa ketompelo kutya oshikalimo sheindilo osho unene sha simana ndele hashi tsa shopamulandu ngaashi  shoka sho ku gandja omishangwa dheindilo kwa tokelwa noominute 90.
Aapanguli yOmpangu onene ota ya tokola ngele otaya  pe oongundu ndhika ompito opo dhi pulakenwe, kOmpangu onene yoshilongo.