TransNamib a sindana lwotango

EHANGANO lya TransNamib olya sindana medhingoloko lyotango okutindila aanambelewa yalyo yaali opo yakalelwepo kaatseyimpango pethimbo taya pulakenwa shoka inaa ya vulika miilonga yawo.

Aanambelewa mbaka otaya tamanekwa shoka aniwa ya longo pombambo kombinga yotendela yongushu yoodola oomiliona 10.
Omunashipundi shokangundu hoka taka tamaneke oomanager ndhika mbali, Dirk Conradie okwa lombwele omanager yomalanditho nomatseyitho,Paul Nashitati noshowo omanager yegandjo lyiilonga Sem Iyambo kutya itaya vulu okukalelwapo piihokolola mbika komutseyimpango gwawo, Jeff Tjitemisa, oshoka pampango dhaaniilonga yo TransNamib yo ota ya vulu okukalelwapo komuniilonga omukwawo nenge komukalelipo gwehangano lyaaniilonga.
Okatopolwa haka kakena esiku ka longithilwe komuniilonga omukuluntu nando ogumwe mehangano ndika ngoka ali ta tamanekelwa epogolo monakuziwa.
Shika osha kwatelamo woo nomukuluntuwiliki gwaTransNamib , Titus Haimbili, ngoka a li a kuthwa miilonga oka thimbo konyala uule womvula ayihe ndele ye okwa li a longitha aatseyimpango yopaumwene opo ya kondjithe oshipotha she shoka a ningilwa kewilikongundu.
Haimbili okwa li a taalela omatamaneko gahamano, gekotokelo, gokorruption, noshowo gegamombinga. Okwa li a monika ondjo mu limwe lyomomatamaneko ngoka, ndele okwa li a hupithwa koPolitiburo yoSwapo sho ya gandja elombwelo kOminista Yiilonga, Helmuth Angula opo a se oshimpwiyu kutya oshipotha osha ekelwahi, omolwaashoka shika osha li sha nika opolitika.”
“Omuna, oshitopolwa tashi ti aanambelewa aakuluntu otaya vulu okukalelwa po kaatseyimpango , unene tuu ngele omatamaneko ngoka taya ningilwa omanene ,omadhigu nenge ga kitakana.
Otatu ka indila ompangu meendelelo’” osho omukalelipo gwawo gwopampango,Tjitemisa ati,konima sho a taamba etseyitho ndyoka lya zi ku Conradie.
Oshipotha shoshene shaanambelewa mbaka osha thanekwa shi kaleko Metine lyoshiwike shika.
Ehangano ota li ti aniwa oomanager ndhika odha kundathana nokutaamba ,noshowo okugandja iilonga yokupititha pamayalulo giifendela, iinima ayihe mbyoka hayi etwa mo tashi pitile moTransNamib. Iilonga mbika hayi longwa kaanambelewa ya TransNamib kehe esiku, oomanager ndhika aniwa oye yi gandja kehangano lyedhina Quick Clearing Services, shika oye shi ningi inaaya lombwela ewiliko lyehangano nenge ootu ewilikongundu lyehangano.
Otaku tiwa mbaka oye na ondjo yokukotokela ehangano.
TransNamib okwa ti mbaka oya ndopa oku landula omilandu dhehangano molwaashoka inaya pewa epitiko neziminino opo ya kundathane nokugandja iilonga mbika kehangano ndyoka lya Quick Clearing Services.
Etamaneko ekwawo olina sha nelombwelo kutya oshinima shika osha pumbwa okukundathanwa kokangundu okawiliki.TransNamib ota ti mbaka oya longo shika no ina ye shi fala komeho gokangundu okawiliki.
Etamaneko etine olya ukilila Iyambo, sho taku tiwa pokati ko 9 June sigo 7 July 2009 okwa li a lombwele aaniilonga moshitopolwa shiifendela kutya ina ya longa iilonga yokupititha iinima pakuyalula ongushu yawo yiifendela, oshoka iilonga mbika aniwa otayi longwa po ku Quick Clearing Services
Ehangano olya ti Iyambo aniwa okwa lombwele aaniilonga ya shaine ashike oombapila dhiifendela pehala lya Quick Clearing Service.
Omunaveta gwaTransNamib, Slysken Makando oye ta tamaneke, mbaka yaali., na Iyambo peha l yehangano.