Ondjila ya Shakati na Mpundja otayi egululwa nena pambelewa

By: OSWALD SHIVUTE

ONKUNDANA ye tu zilila kOshikondo shOondjila sha Namibia otayi ti kutya ondjila yopokati kOshakati nOmpundja ndjoka ya kala tayi longwa omathimbo ga zi ko, otayi egululwa ongula yonena (05.02.2010) kOministeli yIilonga nOmaenditho omusamane Helmut Angula, tashi ningwa pomulongo (10H00) gwongula.

Omupopiliko gwOshikondo shOondjila mo Namibia Fillemon Hileni ta ti kutya Oministeli Angula otaka enda pamwe nOministeli yOmakwatathano gOpamona nOmahumithokomeho gwEpangelo lya Ndoishi omusamane Dirk Niebel noshowo nAanambelewa Aakuluntu mOmauministeli gawo ngaka gaali.
Okwa tegelelwa Ooministeli ndhika mbali nIiyendo yadho ya ka tsakanekwe ku Gavena yOshitopolwa sha Shana omusamane Klemens Kashuupulwa noshowo ku Kaansela gwOshikandjohogololo sha Shakatiuzilo omusamane Loth Kuushomwa, kOokaansela yalwe noshowo kOomeya, ngashi gwa Shakati me Katrina Shimbulu nogwa Ngwediva tate Erastus Uutoni noshowo kAanambelewa yalwe yOshikondo shOondjila mOshitopolwa, kAaleli yopambepo noshowo yopamuthigululwakalo nayalwe yopashigwana.