Jeremiah oku li po hwepo, ihe ‘Kucki’oku li natango monkalo ombwiinayi

AALUMENTU tu yaali mnoka ondhila yawo ontshona ya gu mo e tayi gwile pokapale kokudhanena Ogolfa mOvenduka mEtiyali lyoshiwike shika, ngashiingeyi oye li monkalo yi li hwepo.

Omuniilonga mOhotela ya Rostock Ritz Desert Lodge Aaron Jeremiah, okwa  zi mo mOshipangelo sha Windhoek Medi-Clinic okufala kOshipangelo shilwe mOvenduka uusiku wEtiyali, konima sha tandwa kokwaako kwe kokolumoho.
Aaniilonga pOhotela ndjika oya popi kutya Jeremiah okwa teka okwaako, ihe ote ya ngaa nawa.
 Omuhona gwa Jeremia, ngoka oye wo a li e li koluuli lwondhika ndjika ontshona yo Jabiru 400, Wolfgang ‘Kucki’ Kuhhirt oku li aniwa natango monkalo ombwiinayi, ihe aniwa ote ya ngaa hwepo.
Kuhhirt okwa li a ehameka nayi momutse nomontulo na ota ku popiwa wo kutya okwa ehama wo nayi kehuli.  
Oshiponga shika osha ningwa konima ashike sho ondhila ndjika ya tuka pokapale koondhila ka Eros lwopotundi onti:12h45. Kuhirt na Jeremia oya li aniwa yu uka ko Rostock Lodge.
Ookatalekonawa yamwe oya lombwele iikundaneki kutya okadhila hala oka ka tameke ta ka pegeya, sigo ka gumo e ta ki idhenge momuti gumwe pokapale haka kokudhanena Ogolfa.
Ewawa limwe lyako olya kwatwa komuti gumwe, shoka  nee sha eta aniwa ki idhenge momuti omutiyali. Tango, Omukulunyu gOshikondo shOmakonakono ge na sha nIiponga yOondhila mUuministeli wIilonga, Erickson Nengola, okwa li a lombwele The Namibian kutya oshiponga shika otashi vulika sha etwa kepuko moindjina.
Ihe shika osha ekelwahi ku Ngweda, ngoka a popi kutya Uuministeli otayi ka tseyithila iikundaneki ngele a mana omakonakono gawo moshinima shika. “Ota tu tala iinima iyali mbyoka tayi vulu okweeta oshiponga, ihe ota tu ke mu lombwele,” Ngweda ta popi ngaaka.
Ondhila ndjika oya li ya tuka mondjila yokutuka nokunambela onti 19, ndjoka oyo ondjila onde kwaadhihe pokapale haka ka Eros. Nengola okwa ti omahooli ngoka ga li mondhila ndjika otaga ka konakonwa ku talike ngele oga li ga eta oshiponga moindjina.
Ngweda okwa ti Uuministeli wawo otau tsikile nokulonga niikondo yomatoko goondhila yopaigwana, nelelakano okushunina pevi iiponga yoondhila mbyoka yi li tayi ningo oyindji noonkondo mu Namibia okuza petameko lyomumvo 2007.
Shika oshiponga shondhila oshitiheyali mu Namibia, okuza mu Septemba 2007.

---