Tov Multipurpose Centre tayi gandja ooN$15 kaanona 20 yopOndundu

OKWA kundanekwa oTov Multipurpose Centre poTsumeb tayi kala hayi gandja oodola omulongo nantano kokanona kehe oshiwike kehe monkambadhala oku wu kaleka moskola.

Aanona mbono nee taya kala anuwa haya pewa oshimaliwa shi thike poN$15 oyoposkola yopevi yedhina Ondundu monkambadhala yo ku ya kaleka moskola noshi kale tashi ya tsu omukumo ya ethe po oskola. Omuwiliki gwoTov omusita Edward Amadhila mEtitatu lyoshiwike shino okwa fatululile nawa kutya oshimaliwa shika otashi gandjwa ngaaka kaanona mbaka shi ya tse omukumo ya ethe oskola noonkambadhala ngaandjino okwa talika tadhi ka shunitha lela pevi omwaalu gwaanona mboka haye etha ooskola. “Omwaalu gwaambono ye etha oskola ogu li lela pombanda moTsumeb unene tuu  mokati kaanona yoposkola yopevi yedhina Ondundu, ndjono yi li oshinano shookilometa ndatu kondje yaTsumeb. Otwa ndhindhilike kutya otwa pumbwa lela okukaleka aanona mbaka moskola notwa tokola nee oku ya pa ngaa okashona hoka oku ya tsa omukumo ya kale moskola”, Amadhila a yelitha ngaaka.
Osheetwapo shika okwa thanekwa nee shi ka tameke anuwa ngele ooskola dhe egulukile oshikako oshitiyali shoskola oshiwike tashi ya, konima sho osenda ndjika ya hogolola mo aanona ye li omilongo mbali mbono ya talika ya za ngaa momagumbo ge na lela oluhepo. Amadhila okwa tsikile ta ti oyi inekela omwaalu otagu ka ya lela pombanda ngele ya mono oonzo. Aalongwa nee mbaka omilongo mbali (20) ayehe oya za momagumbo ga talika ko ga hepa noonkondo noya kala nee molukanda lwedhina Kuvukiland.
 Okwa kundanwa haye ende iinano lela ile oku ya nokuza koskola esiku kehe lyoskola naashino okwa talika sha fa osho hashi hingile pombanda omwaalu gwaanona mbono haye etha po oskola. Amadhila okwa yelitha nawa kutya oodola ndhika omulongo nantano (N$15) otadhi ka kala hadhi pewa okanona kehe ngele ashike ke ya koskola omasiku agehe gatano goskola moshiwike kehe. “Ngele okanona oka faula oskola esiku limwe kaa na etompelo tali uvika ko nawa nena itaka pewa sha. Omukalo tagu vulu okulongithwa oku kandula po oluhepo  elongo ashike.
Otwa mona aantu oyendji mba twa kwathela omimvo dha piti kutya oya ninga aakwashigwana aanashimpwiyu lela”, Edward Amadhila a tumbula ndhoka. Omauvaneko ga gwedhwa po oga ningilwa wo aanaskola mbaka aanelago ye li omilongo mbali (20) ngele oya kala nokwi ilonga ya mana mo nokupita nee omakonakono gawo.
“Ngele aanona mbano oya piti ekonakono lyawo lyoskola lyopuAuguste nena, nena kehe gumwe otaka pewa ooN$70. Nongele oya piti nee ekonakono lyopehulilo lyomumvo, ano lyopuDesemba, nena kehe okanona otaka ka pewa ooN$140”, Amadhila a yelitha ngaaka. Okwa tsikile wo ta ti omukulukadhi gumwe gwomunangeshefa gwokOmbaye oye a gandja iimaliwa mbyoka nokwi indile nee anuwa aantu oyendji ya tsikile nokuninga ngaaka.
Osenda ndjoka yedhina Tov otayi kala anuwa hayi pewa ooN$3000 omwedhi kehe koprojeka ndjika notwa tokola nee okulongitha oshimaliwa shoka okugwanitha po kondandalunde oompumbwe dhaanona mboka. Aanona mboka okwa tumbulwa taa vulu okukala haa longitha iimaliwa mbyoka okulanda ongele iikulya yomagumbo gawo nenge omambo. Amadhila okwa ti ngu e na ohokwe yokukala oshitopolwa shedhiladhilo ndino ewanawa okukwathela omidhingoloko dhetweni anuwa ne ya ndjoine.
 Osenda ndjika yoTov Multipurpose yaTsumeb oya totelwe po anuwa momumvo 2001 nelalakano okukwathela oothigwa naanona mboka taya mono lela iihuna moshitopolwa shaShikoto. Osenda ndjika okwa kundanekwa yi na ofaalama kondje yaTsumeb yedhina Evergreen Farming Project nelalakano lyoprojeka ndjika oku pa aanona ye thike po3000 iikulya pamalweetho gatatu esiku kehe. Osenda ndjika oyi li anuwa yi na omukumo kutya
sho tashi ka tya omumvo 2015 otayi ka vula okutuma aalongwa yaali koouniversiti hoka osenda ya hala. Okwa kundanekwa aantu ya thika pomayovi omilongo ndatu haye etha ooskola omumvo kehe pauyelele okuza koNHRP nomatompelo mwaashino mooskola dhopevi anuwa osho shino kutya ooskola odhi li kokule noonkondo niiyenditho ka yi po osho wo kutya anuwa aavali taya nana nondatu okulanda omizalo dhooskola osho wo iikwathitholongo yi ili noyi ili.

---